Halîl Şeno ke semedê protestokerdişÊ tecrîdê vera Rayberê Şarê Kurdî Abdullah Ocalanî 12ê sibate de bajarê Dresdenî yê Almanya de verê Parlamentoyê Eyaletî de xo vêşna û şehîd bi, badê merasîmêkî memleketê ci qezaya Dihî yê Sêrtî rê ame raştkerdene.

Bi seyan kurdîstanijî, rêxistinê çepgêrî  ke paştî danê Têgêrayîşê Azadîye yê Kurdî û Wekîlê Parlamentoyê Eyaletê Saksonya yê Partîya Çepe Mirko Schulze tewrê merasîmî bîyî.

Qiseykerdişê akerdişî Endamê Heyetê Rayberdişî yê FED-KOMî Kerem Gokî kerd. Gokî semedê wayîrvejîyayîşê şehîdan veng da û mektubê Şenî wend.

Bi nameyê Heyva Sor a Kurdîstanî zî Cengîz Toyî qisey kerd. Toyî vat: ''Cuya Şenî mîyanê xoverdayîşî de ravêrte û ey çirey tecîrdê vera Serek Apoyî qebûl nêkerd.''

Endamê Heyetê Rayberdişî yê FED-KURDî Menderes Canbekî zî vat: ''Embaz Halîl ma soz danê to. Mucadeleyê to do erdî de nêmano. Ma do Serek Apoyî û Kurdîstanî azad bikerê.''

Bi nameyê TJK-E Zozane Serhad zî bale ante mucadeley Halîl Şenî ser û vat: ''Embaz Halîlî emrê xo da nê mucadeleyî. Ganî ma mektubê ey rind fehm bikerê. Vatiş, vengdayîş û rexneyê ey semedê ma manîfesto yo.''

Hemserekê KCDK-E  Yuksel Koçî zî ard ziwan ke çalakîya Halîl Şenî têna vera tecrîdî nîya vera şarê xo zî yew rexne yo û vat: ''Eke ma hemrayê embaz Halîlî yê ganî ma mucadeleyî pîl bikerê. Ma şexsê embaz Halîlî de soz danê şehîdan. Ma do ser bikewê û Kurdîstanî azad bikerê.''

Wekîlê Parlamentoyê Eyaletê Saksonya yê Partîya Çepe Mirko Schulze zî  ard ziwna ke ê senî şehdatê Şenî ra dej ancanê û vat: ''Ganî ma mucadeleyê ey pîya rayra berê.''

Qiseykerdişê bi nameyê Komîteya Womend Defend Rojava ya Dresdenî zî ame vatene ke mucadeyeleyo ke Halîl Şenî reyra berd semedê înan çimeyê îlhamî yê mucadeleyê azadîye yo.

Badê merasîmî cenazaya Halîl Şenî bi slogananê ''Şehîd nêmirenê'' û ''Wa biciwîyo Serek Apo'' memleketê ci qezaya Dihî ya Sêrtî  rê ameye raştkerdene.