Rayberê Şarê Kurdî Abdullah Ocalan 25 serrî yo binê tecrîdêkê giranî de tepişîyeno û 40 mengî yo ey ra xeberêke zî nêameye girewtene. Tirkîyaya ke îmzaya xo daya binê Peymana Vergirewtişê Îşkenceyî û Peymana Heqanê Merdiman seba ke nê tecrîdê îlegalî binimna dest erzena cezayanê dîsîplînî û qedexeyanê pêvînayîşan.

Komîteya Vergirewtişê Îşkenceyî (CPT) ya Konseya Ewropa rixmo ke muxataba na bêhuqûqîya tecrîdî ya û eke biwaza do bieşka şora Îmraliyî bêveng a. CPT bi bêvengîya xo bena hemkarê sûcê tecrîdî zî. 

CPTyo ke bêvengîya xo ya vera tecrîdê Îmraliyî ra semed kerdoxê rexneyan o, reya verêne cewab da persan. Hetkarê Serekê CPTyî Hans Wolffo ke Îmrali zîyaret kerdbi muracatê ma yê seba roportajê têrîyî red  kerd la israrê ma ser o bi hawayêkê nuştekîyî cewab da persanê ma.

Roportajê ma wina yo:

''CPTyo ke tewr peyên êlula 2022yî de Îmrali zîyaret kerdbi teyna seba ke destûrê Tirkîya çin o raporê xo nêweşaneno?

Peymana ke CPT aye ser o nîyayo ro wayîra di krîteran a;  hemkarîye û nimitiş. Yanî ancax dewletî destûr bidê CPT eşkeno raporanê xo biweşano.

Seba ke tepişteyanê Îmraliyî ra xeberêke nêna girewtene komel qerqilîyeno. CPT naye ser o xebitîyeno?

CPT meqamanê Tirkîya de dîyalogan keno la nê dîyalogî nimite yê. Hetê bînî ra zîyaretê ma yê 2019î de û ê bînan de heyetanê ma dî ke Zîndanê Îmraliyî de muameleyêka xirabe çin a. Eqsê ci pêro personelê zîndanî bi hawayêkê musbetî verê tepişteyan de têgêrenê.

Eke xeberêke nêra girewtene şima do ancî şorê Zîndanê Îmraliyî?

CPT serranê 1999, 2001, 2003, 2007, 2010, 2013, 2016, 2019 û 2022 de yanî 9 reyî bi hawayêkê xoserî Îmrali zîyaret kerd. Eke hewce bivîno CPT do ancî şoro uca.

Avûkatê Rayberê Şarê Kurdî Abdullah Ocalanî û tepişteyanê bînan bale ancenê ser ke hîrê serrî yo muwekîlanê xo nêvînenê. Gelo hayîya CPTyî bi ney est a? Seba vergirewtişê na rewşe CPT se keno?

CPT rewşa Abdullah Ocalan û hîrê tepişteyanê bînan nêzdî ra teqîb keno. Dîyaloganê bi meqamanê neteweyîyan reyde CPT avûkatanê Abdullah Ocalanî de zî bi hawayêkê sîstematîkî temasan virazeno.

Tepişteyê Îmraliyî gelo binê tecrîdêkê mutleqî de yê yan?

CPTyî raporê xo yê zîyaretê 2019î de bale ante ser ke nê tepişteyî zafêr binê îzolasyonî de yê; yanî 168 saetanê hewteyî de 159 saetî. Goreyê krîteranê CPTyî na rewşe nêna qebulkerdene.

CPTyo ke vera îşkence û kerdişanê xiraban têkoşîn keno astengkerdişê pêvînayîşanê bi keye û avûkatan de çi fikirîyeno? No binpaykerdişê peymane nîyo?

Na babete tim mabênê CPT û dewleta tirke de sebebê dîyalogan bîye. CPTyî dîyaloganê bi selahîyetdaranê Tirkîya de çend reyî ard ziwan ke astengkerdişê pêvînayîşan binpaykerdişê peyman û krîteranê mîyanneteweyîyan o.

CPTyî raporanê xo yê verênan de meqamanê Tirkîya rê tay pêşnîyazî kerdbî ke şertê Îmraliyî wa bêrê raştkerdene. Tirkîya gelo goreyê nê pêşnîyazan têgêraya?

Cewabê ke o çax Tirkîya dabî pêşnîyazanê ma sîteyê ma de est ê. Nê cewaban ra ber ma nêeşkenê agahîyêke bidê şima.

CPTyî wextêkî ra dima vera Azerbaycanî goreyê madeya 10î ya peymane eşkerayîyêke daye rayaumûmîye. Nîyetê şima est o ke şima vera Tirkîya zî çîyê winayênî bikerê?

Cewab nêdîya...

Serekanê CPTyî yê verênan Mauro Palma û Marc Neveyî roportajanê xo de vatbi ke Îmrali seba zîndanêkî lokasyonêko raşt nîyo û CPT eşkeno vera nê şertan bi aktîfî têbigêro. Gelo goreyê şima Îmrali sey zîndanêkî lokasyonêko raşt nîyo? CPT wazeno vera şertanê Îmraliyî rolêkê hîna aktîfî kay bikero?

Cewab nêdîya...''