Rojnamegerê almanî Marlene Forster û Sloven Matej Kavcic 20ê nîsane de wexto ke şayîya Çarşemeya Sore ra agêrayêne hetê artêşa Iraqî ra tepişîyabî. Şaristanê Darmstadtî yê Almanya de bi armancê veradayîşê di rojnamegeran çalakîyêke ameye kerdene.

Endam û îdarekarê Merkezê Komelê Demokratîkî yê Kurdan zî tewrê çalakîye bîyî. Dadîya rojnamegere Marlene Forster, Lydia Forster ard ziwan ke bi şertê qiseykerdişê bi îngilîzkî têna aye rayêke kênaya xo de qisey kerda. Dayîke Forstere vat ke ê qet mana nêdanê tepişîyayîşê kênaya xo û waşt ke kênaya ci û embazê ci wa bêrê veradayene.

Nameyê Partîya Çepgîre ser o Jan Schalauskeyî zî tepişîyayîşê di rojnamegeran şermezar kerdî û vat ke eke hewce bibo ê eşkenê heyetêkî bişawê Iraqî.