Demîr: Ewropa tesîrê Abdullah Ocalanî ra tersaye

Sîyasetmedar Mehmet Demîro ke bi serran Ewropa de vera koomplo mucadele kerd îfade ke seba ke kayê înanê gemarinî nêvejîyê werte û tesîrÊ ci ra tersayêne Ewropa nêwaşte Ocalan uca de bimano.

Mehmet Demîr serra 1970an ra nata Almanya de ciwîyeno û têkoşînê azadîye yê kurdan de wezîfeyê girîngî kerdî. Demîrî ronayoxanê Federasyonê Komeleyanê Kurdan (YEYKA) ra bi û dima zî YEK-KOM de îdarekarî û serekîye kerde. Demîr şahîdanê prosesê Komployê Mîyanneteweyî ra zî yew o. Mehmet Demîrî ANFyî rê qala prosesî kerde.

12ê teşrîna peyêne de wexto ke Rayberê Şarê Kurdî amebi Roma şima şaş bîyî yan?

O çax 150 merdiman seba ke ca bêro dayene Rayber Apo Bonn de grevê vêşanîye kerdêne. O çax Rayberê Şarê Kurdî ame Roma. A roje ra dima kurdî her roje pê 3-4 otobusan û wesayîtan şîyî Roma. Roma pê kurdan bîye pirr.

Wexto ke to eşnawit Rayberê Şarê Kurdî Ewropa de yo to çi hîs kerd?

Rayberê Şarê Kurdî tim vatêne 'meseleya kurdan meseleyêka mîyanneteweyî ya.' Goreyê ci ganî pêro nê hezan mesele çareser bikerdêne. Rayberê Şarê Kurdî zanayêne ke Almanya derheqê ci de bira tepiştişî daye û Ewropa berê xo anêkena. La o çareserîya mesele de isrardar bi. Ey waştêne muxatabanê bînan zî wa tewrê çareserîya mesele bibê. Goreyê Rayber Apoyî Ewropa meseleya kurdan de cayêko girîng girewtêne. Rayberê Şarê Kurdî hol zanayêne ke eke o xo biresno çime mesele çareser bena.

Wexto ke Rayberê Şarê Kurdî Roma de bi seba çareserîya mesele konferanso mîyanneteweyî û mehkemeya mîyanneteweyî visîyayî rojdem heta tay sîyasetmedaran zî paştî daye ney. La dima seba nê prosesî gamêke nêerzîyaye û Rayberê Şarê Kurdî neçare mend ke Îtalya ra vejîyo...

O çax Almanya de Demokratê Sosyalî/Keskî îqtîdar de bîyî. Înan ra Cem Ozdemîrî vat ke 'Wa Ocalan Lahey de bêro hukmkerdene.' Rayberê Şarê Kurdî zî seba mehkemeyêka winasêne amade bîyî. Na mehkeme de sûcê şerî yê Tirkîya zî do biameyêne ercnayene. La welatanê Ewropa na mehkeme asteng kerde. Çunke ê nêwaştêne eşkera bibo ke înan senî çareserîya meseleya kurdan asteng kerde. Dima Almanya cade bira tepiştişî wedarite. A roje ma Bonn de verê bînaya wezîrîye de çalakîye kerdêne.

27ê teşrîna peyêne ya 1988î de Serekwezîrê Almanya Gerhard Schroderî û Serekwezîrê Îtalya Massimo D'Alemayî pêvînayîş kerd. Ti a roje ra behs kenî?

Heya, a roje 30 hezar merdimî Bonn de bîyî. Roma de zî meydan pirr bi. Almanya D'Alema îqna kerd û bira tepiştişî wedarite. Dima hukmatê Îtalya gêrîya binê teda. Coka Rayberê ŞArê Kurdî nêeşka Ewropa de xo rê cayêk bivîno. Sere de Îngilîstan, Fransa û Almanya rîyo gêmarin ê welatanê Ewropa eşkera bi. Komployê Mîyanneteweyî de rolê remnayîş û esîrgirewtiş hetê Amerîka û Îsraîlî ra ame kerdene û xeylêk rolî zî dîyayî welatanê bînan. Fînlandîya, Norweç û Hollanda mîsal verî waştêne Abdullah Ocalan bêro welatanê înan. La dima înan teda ra nêwaşt. Seke Rayberê Şarê Kurdî vatêne Îngilîstan bira polîtîkaya mîyanneteweyî dayêne welatanê bînan zî o teqîb kerdêne.

Yunanîstan, Rûsya, Îtalya û Hollanda muracatê bextwaştişê Rayberê Şarê Kurdî qebul nêkerd. Ti na mesele senî ercnenî?

Cuntaya 12ê Êlule ra dima Ewropa, Amerîka, Kanada û heta Avusturalya heqê bexwaştişî da xeylêk kurdan. La înan no heq nêda Rayberê Şarê Kurdî. Îtalya esîrkerdişê Ocalanî ra dima no heq da ci. Ez vana nê pêro karakterê esasî yê komployî eşkera kenê.

Ewropa rayberê 40 mîlyon kurdan rê berê xo qefilnayî. No serebût tarîx de senî ca bigêr?

Birêz Ocalanî îfade kerd ke nika dinya de modernîteya demokratîke vera modernîteya kapîtalîste şer keno. Ewro fikrê Rayberê Şarê Kurdî pêro dinya de şinasîyenê û enternasyonalîstî wayîrê nê fikran vejîyenê. Semedo ke têgêrayîşê azadîye pê vateyê çewî tênêgêreno Ewropa waşt ke verê ci bigêro. Rayber Apoyî no têkoşîn pê dînamîkanê kurdan aver berd. Înan dî ke Birêz Ocalanî cinî û komelê kurdan kerdî azad. Welatanê Ewropayê ke naye ra tersayî ca nêda ey. Almanya gerîlayanê UÇKyî perwerde kerdî erşawitî Kosova. La heman Almanya Rojawan de tehluke ya û kena ke sembolanê YPG, YPJ, YBŞyî qedexe bikera.

No tewirê welatanê Ewropa tarîx de kişta şermî de ca bigêro û qet nêro vîrakerdene.