Dêrsim de semedê ronayoxanê serkêşan ê PKKyî Alî Haydar Kaytan û Riza Altunî vîrameyîşo biheybet ame kerdene. Hemserekê Pêroyî yê DBPyî Keskîn Bayindir, wekîlê DEM Partî, Hemşaredarê Dêrsimî yê ke herinda înan de qeyûm ame cakerdene, DAD û rêxitinê komelê sîvîlî yê bajarî zî tede xeylê kesî tewrê vîrameyîşî bîyî.

Polîsan Meydanê Seyîd Rizayî girewt binê ablûqa, bi hezaran kesan ablûqaya polîsan şikit û dest pê rayraşîyayîşî kerd. Rayraşîyayîş de sloganê sey ''Şehit namirin'', ''Heval Fuat rumeteme ye'', ''Kurdîstan do bibo mezele faşîzmî'' ameyî vatene. Verî rayraşîyayîşî şar taxa Gazîkî de verê Shell Petrolî de ame têhet. Hemwelatîyê ke polîsan destûr nêdabi bikewê bajarî yê zî tewrê rayraşîyayîşî bîyî.

Şar bi slogananê Şehîd nêmirenî resa Meydanê Seyîd Rizayî û tîya merdimanê Kaytan û Altunî de ame têhet. Vîrmayîşê bi wendişê Gulbang û beyîtan dewam kerd. Çeraxî amayî tafînayene û şîîra Alî Haydar Kaytanî ameye wendene.

Merkezê bajarî de hetê Mudirîya Polîsan ra ceyran ame birnayene, şarî bi çapikan no protesto kerd.

Qirkerdişî û xoverdayîşê girdî

Wekîla DEM Partî ya Dêrsimî Aytene Kordu vat, ''Herra ma qirkerdişî zî dîyî xoverdayîşê tewr girdî zî dîyî. Ez keyeyanê Altun û Kaytanî rê serweşîye wazena.''

Wekîla DEM Partî ya Şirnexî Newroze Uysal zî  mesajê Rayber Apoyî ke semedê wird kadroyanê serkêşan şawit, wend. Şarî bi deqîqayan slogana “Bijî Serok Apo” vate.

Bayindir: Ma do sîya girêmedê

Hemserekê Pêroyî yê DBPyî Keskîn Bayindirî nê vatî: ''Ê sembolê heqîqetî bî.  50 serrî semedê azadîya şarê kurdî û bindestan bêmabên têkoşîn kerd. Bi vatişî ma nêeşkenê têkoşînê înan pênas bikerê. Ê hemra û rayberdoxê heqîqetî bî. Ma do sîya girêmedê. Ewro hêvîya haştîye vejîyaya meydan. Ma do têkoşînê înan bi xurtkerdişî bidomnê. Vengdayîşê Haştîye û Komelê Demokratîkî serkêşîye Birêz Abdullah Ocalanî de dewam keno. Ma waştêne pêro raywanê heqîqetî serkewtişê têkoşînî bivînê. Ma xeyrê  raywananê heqîqetî ke dinyaya xo bedilnaye, heta nê rojan ameyî. Ma do semedê bi hezaran Devrîşan ke dinyaya xo bedilnaye, sîya girçmedê, herinda nê de ma do na herre de înan rê azadîye û haştîye dîyarîya înan bikerê. Oxir bo Devreşê Dêrsimî.''

Îdarekara MEBYA-DERî Emîne Kaya zî ard ziwan têkoşînê 52 serran bi hewayêkê bêhempayî dewam keno vat ma xeyrê şehîdanê xo heta ewro ameyî ma do têkoşînê înan bidomnê.

Hetkara Hemserekanê DBPyî Narîne Gezgor şîîra Alî Haydar Kaytanî ''Ez merdim bîya'' wende.

Badê wendişê deyîşan û vilakerdişê loqma  keyeyanê Altun û Kaytanî tezîyeyî qebul kerdî.