Sîwana Meclîsan ê Cinîyan a Êzidîyan (SMJÊ) semedê zêdîyayîşê gefanê vera Şingalî eşkerayîyêke daye. Eşkerayîye de Peymana Bexdad-Hewlêrî ya serê Şingalî ameye vîrvistene û dîya zanayene ke gefê vera Asayîşê Êzidxan û îdareyê xoserî yê Şingalî zêdîyayî.

SMJÊ pare kerd ke 100 rojî yo seba wayîrvejîyayîşê Şingalî verê Merkezê Asayîşî yê Êzidxanî de nobeta xeyme yena kerdene. SMJÊ peynîya eşkerayîye de venga pêro êzidîyan da ke wayîrê Şingalî vejîyê. SMJÊ venga pêro kurdan, hêzanê demokratan, cinî û ciwanan  da ke wayîrê YBŞ, YJŞ û Asayîşê Êzidxanî vejîyê.

Hetê bînî ra ewro şaristanê Celle yê Almanya de saete 14.00 de Grosser Plan de seba wayîrvejîyayîşê Şingalî çalakîyêke do bêra kerdene. SMJÊ venga pêro kurdîstanijan da ke tewrê çalakîye bibê.

Sîwana Meclîsanê Dewan ê Êzidîyan zî bi heman armancî eşkerayîyêke daye û venga pêro kurdan da ke mesuldarîya xo bîyarê ca, wayîrê Şingalî vejîyê.