Paytextê Yunanîstanî Atîna û paytextê Almanya Berlîn û bajarê Hildesheîmî yê Almanya de seba vîrardişê endamê Konseya Serekîya Pêroyîye ya KCK’yî Dîyar Xerîbo ke 5’ê Temmuze de, hêrişê hewayîyî de cuya xo vînî kerde aktîvîteyî ameyî viraştene.

Atîna de Rayraşîyayîş

Atîna de bi rayraşîyayîşêk  îşxalê dewleta Tirkî yê vera Başûrê Kurdistanî û qetilkerdişê Dîyar Xerîbî ameyî şermezarkerdene. Çalakgerî bi beyraqanê PKK û KCK’yî verbi konsolosxaneyê Tirkîya rayra şîyî û bi sloganan îşxalê dewleta Tirkî û xîyanetê PDK’yî şermezar kerd. Vernîya konsolosxaneyî de vera hêrişê dewleta Tirkî û hemkarîya hukmatê Başûrê Kurdistanî reaksîyon ame dayene.

Hîldesheîm de Masaya Vîrardişî

Bajarê Hîldeshêîmî yê Almanya de zî seba Xerîbî masaya vîrardişî ameye ronayene. Vîrardişo ke bi rêzgirewtişî ame destpêkerdene de ame vatene ke bi sûîqastan yeno waştene ke yewîya Kurdan bêro xeripnayene. Qiseykerdoxan qetilkerdişê Mam Zekî Şengalî û Dîyar Xerîbî sey hedefkerdişê yewîya Kurdan hesibna  û vat ê do destûr nêdê waştişê înan bêro ca û seba ke xîyalê Xerîbî bêrê ca ê do xoverdayîş gird bikerê.

Berlîn de Mîtîngê Vîrardişî

Paytextê Almanya Berlîn de zî bi heman waştiş mîtîngêk ame viraştene. Mîtîngo ke Meydananê tarîxîyan ê Berlînî ra Brandenburg Tor de ame viraştene Cimatê Kurdistanijanê Azadan , Meclîsê Cinîyan ê Dest-Dan  û PYD yê Berlînî organîze kerd. ATÎK zî paştî daye ci. Qiseykerdişan de qirkerdiş û îşxalê dewelta Tirkî bi ziwanêkê tûjî ameyî şermezarkerdene û vera ajanan û hemkaran reaksîyon ame dayane. Ame vatene ke no hêriş vera yewîya Kurdan ameyo kerdene û ame waştene ke heme Kurdî û dostê înan vera naye vengê xo berz bikerê.