Dora qedexeyê kurdkî ra grevê vêşanîye de yo
Mazlum Dora seba ke zîndan de seyrkerdişê kanalanê xebere û muzîkî yê bi kurdkî bi bahaneya 'şikdar o' ameyo astengkerdene dest pê grevê vêşanîye kerd.
Mazlum Dorayo ke serrêke ra nata Zîndanê Stammheimî yê Stuttgartî yê Almanya de tepişte yo, dest pê grevê vêşanîye kerd.
Roniştişê dewa de 4ê gulane de Dorayî ard ziwan ke zîndan de kanalê Medya Haber, Stêrk Tv û MED Muzikî yenê astengkerdene coka ey dest pê grevî kerdo. Dorayî vat: ''Roja dişemeyî wexto ke mi waşt kanalî seyr bikera mi dî ke pêro kanalî girewte yê. Wexto ke mi pers kerd înan vat ke nê kanalî şikdar ê coka yenê astengkerdene.''
Avûkatê Dorayî Christos Psaltirasî di xeberê rojnameyê Ozgur Politika mojnayî.
Dima ke Wezîrê Karanê Teberî yê Tirkîya Çavuşogluyî Berlin zîyaret kerd, gulana 2021î de hunermend Mazlum Dora zî tede 3 kurdî ameybî tepiştene. Dora 11ê gulane de seba ke karanê xo yê fermîyan hal bikero şibi Esslingen amebi destbendkerdene, erdî de amebi dergkerdene û destê ci peyî ra ameybî kelemçekerdene.
Dora xebatanê xo yê hunerî ra yeno muhakemekerdene.
