Ehmede Parlamentoyê Brîtanya de qisey kerd

Hemsereka Meclîsê Sûrîyeya Demokratîke Îlham Ehmede Parlamentoyê Brîtanya de qisey kerd.

Hemsereka Meclîsê Sûrîyeya Demokratîke Îlham Ehmed a ke paytextê Îngilîstanî yê Londonî de pêvînayîşan kena, vizêr şan Parlamentoyê Brîtanya de qisey kerd. Ehmede babeta hêrişî ya dewleta Tirkî û têkoşînê vera DAÎŞ’î ya pîya xeylî babetî ercnayî.

BALE ANTE SERÊ GREVÊ VÊŞANÎYE

Kombîyayîşo ke hetê Parlamenterê Partîya Karker Lloyd Russell-Moyleyî ra ameyo viraştene  zaf rojnameger û sîyasetmedarî beşdarê ci bîyî.

Îlham Ehmede kombîyayîş o  ke hetê Merkezê Xebatanê Kurdî yê Londra (Centre For Kurdîst Progress) ra ameyo oerganîzekerdene de ard vîrî ke destê înan de zanayîşê 800 DAÎŞ'îyan estê û nê hemwelatijê 47 welatan ê û ganî nê welatî seba hemwelatijanê xo çareyêk bivînê.  Ehmede vat, dewleta Tirkî tim hêrişê serê Kurdan kena û hêrişê înan ê serê Kurdan zêde bîyî. Tecrîdê serê Rayberê Şarê Kurdî Abdullah Ocalanî ard vîrî û vat seba ke nê tecrîd bêro wedaritene bi seyan Kurdî kewtî grevê vêşanîye.

MOYLE: ROJAWAN 100 SERRÎ VERNÎYA BRÎTANYA DE YA

Lloyd Russell-Moyleyî muşahedeyê serdana xo yê Vakûrê Surîye yê ke verê çend mengan kerdibî qisey kerdî û vat, “Çend mengî naye ra ver ez şîya mi ca de bi çimanê xo dî ke demokrasî senî yeno nejirnayene. Na herêma ke sey vEra cinîyan yena dîyayene de mi dî ke cinî senî heme wareyanê cuye de pîya ciwîyenê. Mi dî ke cimatê ke kultur û bawerîya xo cîyaya senî tehet de pîya ciwîyenê. Ez şaş menda ke sîstemê cimatkî yê konfederalîstî yo cugehpawitox, demokratîk, femînîst û bizafane nê cayan de senî ameyo awankerdene. Ez eşkena bivaja nê hetî ra Rojawan, Brîtanyaye ra 100 serrî hîna aver de yo. Eke ma nê sîstemê komelkî yê na herêma ke medenîyet tede bîyo nêpawê, o wext ganî ma reyna qaydayanê xo yê ercnayan ser o bifikirîyê.”

Hetê bînî ra babeta DAÎŞ’î esta, ma sipasîyêk deyndarê Kurdan ê ke înan DAÎŞ’ bin kerd. Çîyêko bîn zî ganî ma bale biance serê hêrişan ê dewleta Tirkî”

47  WELATAN RA 800 ENDAMÊ DAÎŞ'Î

Hemsereka Meclîsê Surîyeya Demokratîke Îlham Ehmede bale ante serê girewteyanê DAÎŞ’îyan ê ke destê QSD’yî de û vat, “Nika destê ma de 4 hezar keyeyê endamanê DAÎŞ’î û nêzdîyê 800 endamê DAÎŞ’î estê. Nê 800 DAÎŞ'î hemwelatijê 47 welatan ê. Ma wazenê nînan teslîmê welatanê înan bikerê. Şerê vera DAÎŞ'î de ma 8 hezar şehîdî dayî, bi hezaran birîndar û xazîyê ma estê. Nê şerî de û bi nê bedelan hem ma asayîşê xo ard ca hem zî asayîşê heme Ewropaye. La ez eşkena nê zî bivaja; hîna zî tehlukeyê DAÎŞ'î mîyan ra nêwedarîyayo. Hîna zî Reqaye de hêrişê bombayî yenê kerdene. No semed ra vera DAÎŞ'î têkoşîn bê mabên ganî bidomno. Çîyêko tewr muhîm zî ganî asayîş û arammendişê na herême yo. No do bibo temînatê demokratîkbîyayîşê Surîye.”

Dewleta Tirkî vana a şerê terorî kena. QSD'yî yo ke vera DAÎŞ'î de şer keno sey terorîst vînana. Çimê dewleta Tirkî de heme Kurdî terorîst ê. Nêwazena ke Kurdî bibê wayîrê îradeyî û xo bi xo îdarê bikerê. Şima vînenê, welatê xo de 20 mîlyon Kurdî estê û hêrişê serê Kurdan û weçînitoxanê HDP’yî yê ke 6 mîlyon rayî girewtê kenê, înan erzenê zîndanan.

Nika bi seyan merdimî grevê vêşanîye de yê labelê dewleta Tirkî xo nayo  kerrîye. Perse persa terorî nîya, ganî Kurd bireso heqanê xo yê bingeyênan. Serê Rêzdar Ocalanî de tecrîdêko giran esto. Heme heqê ey dest ra ameyê girewtene. No nêzdîbîyayîş eynî wext nêzdîbîyayîşê Kurdan o zî. Nika zî Rojawanî tehdît kenê  û vanê ma hêrişê ci kenê. Eke hêrişêk bêro kerdene o wext her çî beno sey verî. Koçkerdişêko gird do dest pêbikero. DAÎŞ  reyna eşkeno xo arê bido û xurt bikero. Heta DAÎŞ yê neweyî zî vejîyenê meydan.”