Rayraşîyayîşê enternasyonalîstan ê seba azadîya Ocalanî 10ê sibate de Luksembourg de dest pê kerdbi. Welatanê Îspanya, Fransa, Amerîkaya Latîne, Afrîkaya Başûre, Kanada, Ekvador, Awustralya û Îskandînavya ra 120 enternasyonalîstî tewrê rayraşîyayîşî benê. Roja çarine ya rayraşîyayîşî Nancy de dewam kerd.

Roja pancşemeyî komîteya amadekare şaristanê Nancyî de salonêka sporî kîra kerd ke raywanî şewe tede bimanê. Salona sporî de şan semînerêk ame serûberkerdene û sîyasetmedaro kurd Eyup Doru sey qiseykerdox beşdarê ci bi.

Eyup Doruyî qala şerê kolonyalîstî yê Rojhelatê Mîyanênî, têkoşînê kurdî, tezê ''Rayîrê Hîrêyînî''yê Rayberê Şarê Kurdî Abdullah Ocalanî kerde.

Doru îfade kerd Komployo Mîyanneteweyî dewam keno, vera şarê kurdî şerêkê topyekûn dest pêkerd.

Doru eşkera kerd ke terefgîrê şerî netewe-dewlete û cîhadîst ê ke Tirkîya paştî dana înan û vat şarê kurdî şarê kurdî xo nêzdîyê înan nêkerd û şarê herême reyde Konfederalîzmo Demokratîk xo rê kerd armanc.

Sîyasetmedar Doruyî da zanayene ke Konfederalîzmo Demokratîk o ke Ocalan ci rê vano rayîrê hîrêyînî, Rojawan de ame kerdene û venga enternasyonalîstan da ke wayîrê şorişê Rojawanî bivejîyê.

Qiseykerdişê Doruyî ra dima enternasyonalîstanê welatanê cîyayan vînayîşê xo ardî ziwan.