75 enternasyonalîstê ke seba azadîya Ocalanî Luksembûrg ra kewtbi rayîr, dimayê rayraşîyayîşê 223 kîlometreyan ewro zî do biresê Strasboûrgî. Enternasyonalîstî vanê, Ocalan fîlozofêko xurt o ke vîzyonê persanê serdemî aferneno.
Kurd û enternasyonalîstî vera tecrîdkerdişê Rayberê Şarê Kurdî Abdullah Ocalanî û şermezarkerdişê komploya mîyanneteweyîye ya 15'ê Sibate, hîrê hetan ra ver bi Strasboûrgî ray ra şinê û azadîya Ocalanî wazenê. Her hîrê rayraşîyayîşê dergî do Strasboûrgî de biresê pê û rayraşîyayoxî do ver bi warê Parlamentoyê Ewropa, Konseya Ewropa, Mehkemeya Heqanê Merdiman a Ewropa (MHME) û Komîteya Vernîgirewtişê Îşkenceyî (CPT) rayraşîyayîş bikerê.
75 ENTERNASYONALÎSTÊ DESAN WELATANÊ CÎYAYAN RA
Rayraşîyayîşê dergî yê vera tecrîdî, bi şîarê “Tecrîdî bişikne, faşîzmî birijne û Rayberî azad bike” bajarê Baselî yê Swîsre de, bajarê Mannheîmî yê Almanya de û Luksembûrgî de dest pêkerd. Semedê muhîmbîyayîşê rayraşîyayîşê Luksembûrgî, 75 kesê ke grube de ca girewto enternasyonalîst ê. Nê 75 enternasyonalîstî welatanê Spanya, Almanya, Portekîz, Kolombîya, Katalonya, Bask, Endulus, Fînlandîya, Galîçya, Norwêc, Îtalya û Swîsreyî ra beşdarê rayraşîyayîşî bîyî.
ENTERNASYONALÎSTÎ ÇIRA SEBA OCALNÎ RAYRAŞÎYAYÎŞ KENÊ?
Gelo nê enternasyonalîstê zaf welatanê cîhanî ra ameyî û poster, ala û resimanê Ocalanî berz kenê, seba çinayî Luksembûrg ra heta Strasobûrgî 223 kîlometreyan ray ra şinê. Goreyê vatişanê enternasyonalîstan, sebebê tewrebîyayîşê înan ê rayraşîyayîşî yê dergî fikrê Ocalanî yê. Tayê înan fikrê Ocalanî bi xo wendê û kewtê tesîrê ci. Tayê ci zî binê tesîrê iRojawanî yo ke çimeyê xo fikirîna Ocalanî yo de mendê. Seba neye ra sloganê “Rojawan do bibo goristanê faşîzmî” qîrenê û nîşan danê ke ê Rojawanî ra wayîr vejîyenê.Goreyê înan, Ocalan fîlozofêkê zaf xurt o û o çareserîya persanê serdemî aferneno. Pênasê modernîteya demokratîke û fikrê Ocalanî yê serê têkoşînê azadîya cinîyan bi taybet bala cinî û camêrdan enternasyonalîstan ancenê rayraşîyayîşî ser.
JIN JÎYAN AZADÎ' Û CINÎYÊ ENTERNASYONALÎSTÎ
Nêmeyî ra zêdeyê enternasyonalîstan cinî yê. Çalakîye de ge-ge slogana “Ma heme Leyla yê” ameye qirayayene û grevê vêşanîye yê Leyla Guvene ame silam kerdene. 34 cinîyê enternasyonalîstî 2 rojî raver mektubêka paşîtîdayîşî Leyla Guvene ra şawitibî. Cinîyê enternasyonalîstî rayraşîyayîşî de bi Kurdkî slogana 'Sara, Rojbîn, Ronahî - Jin Jîyan Azadî' qîrîyayî.Rayraşîyayîş de enternasyonalîstê mîmar, parêzer, doktor, pisporê têkilîyanê mîyanneteweyî, rojnamegerî û zaf meslegan ra merdimî estê, hetê nîyadayîşê îdeolojî ra zî wayîrê anarşîmz, demokrasî, çep û femînîst ê.
