Seba şermezarkerdişê komploya mîyanneteweyîye ya 15'ê Sibate, enternasyonalîstî her serre Luksembûrgî ra ver bi Strasboûrgî rayraşîyayîş kenê.

Rayraşîyayîşo derg ê emserî bi beşdarîya zaf enternasyonalîstanê Almanya, Spanya, Îtalya, Amerîkaya Başûrî, Portekîz, Fransa û zaf welatanê bînan ra kesî tewrê ci bîyî. Tewrbîyayoxan serê amancê çalakîya xo ajansê ma rê qisey kerd.

SEBEBÊ TEWRBÎYAYÎŞÊ MI, ANALÎZÊ OCALANÎ YÊ SERÊ MODERNÎTEYÊ DEMOKRATÎKÎ YÊ'

Rayraşîyayoxo Alman Alex Dîrachmannî ard ziwan ke Ocalan teyna seba ciwananê rayraşîyayîşan muhîm nîyo, o seba her kesî muhîm o û vat, “Birêz Ocalan çîyanê zaf newe û muhîman ano ra ziwan. Sebebê min o muhîm ê tewrbîyayîşê rayraşîyayîşî, analîzê Birêz Ocalanî yê serê modernîteya demokratîkî yê. Merdimê ke Ewropa de, Amerîka, Afrîka û her cayê dinya de, ganî nê analîzê ke peynîya neheqîye anê, peynîya şerê Rojakewtena Mîyanêne anê, fam bikerê. Ez, konfederalîzmê demokratîkî yê Ocalanî sey destpêkerdişê  çareserîya nê persan vînena.

Dîrachmannî ard ziwan, komploya mîyanneteweyîye semedê tersê vilabîyayîşê nîyadayîşanê Ocalanî ra ameya kerdene û vat,  “Amancê komploya mîyanneteweyîye no bi. Fikranê Ocalanî ra zaf tersayî, çunke ey fikrê resnayî rastîye. No bitaybet Rojawanî de hetê hemeyê dinyaye ra ame dîyayene. Ma zî wazenîme nê çîyî Almanya de bîyarîme ca. Bêguman ganî ma zaf bixebitîme. Seba Çepê Almanya hîna wext esto. Seba bîyayîşê ney ez xo wezîfedar hîs kena.

ŞOREŞÊ ROJAWANÎ SEBA HÊZANÊ ÇEPAN ZÎ ALTERNATÎFÊK O

Rayraşîyayox Teho Albrecht ê Almanî bale ante serê muhîmîya paştîdayîşê ciwananê enternasyonalîstan yê seba têgêrayîşê Kurdan û vat, “Şoreşê Rojawanî hêvîyêka girde daye ciwananê Ewropa. Seba ke şoreşêko pratîk û gird ê nê demî yo. Şoreşê Rojawanî nîşanê ma hemeyan da ke vera modernîteya kapîtalîste no seba hemeyê dinya şoreşêko alternatîf o.

Albrechtî bi taybetî bale ante muhîmîya fikranê Ocalanî ser û ard ziwan,  Ocalan tarîxê çepgirîye ra cîya tecrubeyanê pratîkan ê neweyan vejeno meydan. Albrechtî wina dewam kerd: “Fikrê Ocanî yê zaf başî estê. Ey hemeyê şaşîtîyê fikrê çepîye yê ke heta nika ameyê kerdî rast û yew tecrûbeyo neweyo pratîk vet meydan.”

Albrechtî seba tecrîdkerdişê Ocalanî zî vat, “Tecrîdkerdişê Ocalanî însanî nîyo, xofdar o. Polîtîkayêka sey ya Tirkîya Almaya de yenê kerdene. Almanya zext bi enternasyonalîstanê ke paştî danê Kurdan kenê. Hukmetê Almanî wextê îşxalkerdişê Efrînî de hetkarîye daye Tirkan û ez naye ra şerm kena. La vera naye ma zaf xebatî kerdî, seba ke ma xo şoreş û azadîya merdimîye ra berpirsîyar vînenîme.”

EZ FAM NÊKENA ÇIRA DEWLETÊ EWROPA VERA TECRÎDÎ DE BÊVENG Ê

Krîstîna Reede zî ard ziwan ke, nuşteyê Ocalanî yê serê konfederalîzmê demokratîkî  aye ser o tesîr kerdo û vat,  "Tecrîdkerdişê Birêz Ocalanî,  tecrîdkerdişê merdimîye yo. Cayêkê dinya de çîyêko winasî çin o ke yew merdim nêeşkeno kesî reyde qisey bikero, bêro têhet. No binpaykerdişê heqê merdimî yo. Ez vera na rewşêka winasîye de şoq bena. Dewletê Ewropa qaşo demokratîk ê, senî eşkenê vera çîyêkê winasîyî de bêveng vinderê, ez fam nêkena.”

Amara Serbeste ya Almanij a ke tesîrê fikranê Ocalanî yê derheqê cinîyan de menda û şona Rojawan û serre û nêm uca de menda, ard ziwan ke Ocalan teyna seba Kurdan ney, seba heme merdimîye têkoşîn keno. Serbesta ke baş bi Kurdkî qisey kena, awankerdişê akademîyê destpêke yê Jîneolojîyî yê bajarê Hesekî de ca gêna. Serbeste ard ziwan ke, felsefeyê Ocalanî seba merdimîye yo û vat, “Seba naye 20 serrî yo ke girewte yo. Dewletî nêwazenê ke fikrê ey vila bibê, coka o girewte yo. Eke ma wazenê Ocalanî azad bikerê, ganî ma fikranê ey vila bikerê.”