Ewropa de çalakîyê ke bi rojan o semedê wedartişê tecrîdê serê Rayberê Şarê Kurdî Abdullah Ocalanî û baleantişê çalakîya Leyla Guvene ya ke rewşa weşîya ci krîtîk o, yenî viraştene vizêr zî dewam kerd. Çalakîyan de mesajê waştişê Leyla Guvene waştişê ma yê ame dayene.

BERLÎN

Paytexte Almanya Berlîn de seba baleantişê xoverdayîşê tarîxî yê Leyla Guvene  mîtîngêk ame organîzekerene. Çalakîya ke HDP yê Berlînî û pabesteyanê ci organîze kerde temsîlkarê NAVDEMî yê bajarî, Meclîsê Cinîyan ê DESTANÎ û CÎKî zî tewrê ci bîyî. Mîtîngê de derheqê tecrîdê serê Ocalanî û grevanê vêşanîye de ame qiseykerdene û bêvengîya Almanya û Ewropa ameye şermezarkerdene.

KOLN

Bajarê Koln de zî rayberîya Meclîsê Cinîyan ê Vîyane de çalakîyêk ameye viraştene. Çalakwanan derheqê tecrîd û girevanê vêşanîye de vilawekî vila kerdkî, bale ante ke rewşa weşîya Guvene giran a û azadîya Ocalanî waşte.

HAMBURG

Hambrurg de zî yew grûba cinîyan  seba  bale biancê  ke Guvene grevê vêşanîye de ameya sînorê mergî çalakîyêk viraşte. Cinîyî kuçeyê merkezî yê bajarî de kewtî qefasan û bi çalakîya temsîlî tecrîd protesto kerd û bêvengîya Almanya şermezar kerde.

CENEVRE

Bi hemen waştişî bajarê Cenevre yê Swîsre de zî rayraşîyayîşêk ame viraştene. Çalakîya ke bi vengdayîşê CDKyî yê bajarî ameye viraştene xeylî kesî tewrê ci bîyî. Çalakwanî vernîya Ofîsê Neteweyê Yewbîyayeyî yê Cenevre de ameyî pêser û bêvengîya Ewropa şermezar kerde.

BERN

Bajarê Bernî de zî Têgêrayîşê Ciwanan ê Şorişgêrî çalakîyêk organîze kerde. Çalakwanan dezgehanê Ewropa rê hêrsê xo ard ziwan û waşt ke seba paştîdayîşê Guvene û çalakwananê grevê vêşanîye çîyêk bêro kerdene.

ZURÎH

Zurîhde zî  rayberîya Têgêrayîşê Ciwanan ê Şorişgêrî de çalakîyêk ameyê viraştene û çalakwanê grevê vêşanîye ameyî silamkerdene.

AARAU

Aarau de aktîvîstanê Têgêrayîşê Ciwanan ê Şorişgêrî çalakîyêk viraşte. Çalakwanan tecrîdê serê Ocalanî protesto kerd û vat ke waştişê Guvene waştişê ma yê û heta ke ê bêrî bicaardene do çalakîyê ma dewam bikerî.

TORONTO

Bajarê Toronto yê Kanada de zî çalakîya Yusuf Îba yo Kurdistanijî  dewam kena. Toronto de kombîyayîşê şarî ame viraştene û ame vatene ke ganî çalakîyî vila bî û xoverdayîş hîna berz bibo.

BORDEAUX

Bajarê Bordeauxî yê Fransa  de zî aktîvîstanê Têgêrayîşê Ciwanan ê Şorişgêrî çalakîya bêîtaatî ya sivîlî viraşte. Çalawanan derheqê grevê vêşanîye de vilawekî vila kerdî û vat ke waştişê Guvene waştişê ma yê