Bi vengdayîşê lezgînî yê KCDK-E’yî Ewropa de Kurdistanijî vizêr zî vejîyayî meydanan û bale ante grevanê vêşanîye ser.

ZURÎH

Bajarê Zurîhî yê Swîsre de bi çalakîyêk tecrîd ame protestokerdene û grevê vêşanîye ameyî silamkerdene. Çalakwanan vat ke waştişê Leyla Guvene waştişê ma yo û bêvengîya Ewropa şermezar kerde.

BERN

Bajarê Bernî yê Swîsre de zî Kurdistanijî û dostê înan bi heman waştişî kuçeyan de bî. Çalakwanan posterê Ocalanî kiriştî û bi pankartan bale ante grevê vêşanîye ser. Çalakî de ame vatene ke ganî hêzê mîyanneteweyîyî cade vera faşîzmê Erdoganî çîyêk bikerê.

STÛTTGART

Bajarê Stûttgartî yê Almanya de zî semedê paştîdayîşê grevê vêşanîye çalakîyêk ameye viraştene. Çalakwanan, çalakwanê grevê vêşanîye silam kerdî û mesajê xurtkerdişê mucadeleyî dayî.

FREÎBÛRG

Bajarê Freîbûrgî yê Almanya de zî hetê Dergahê Kulturî yê Elewîyan ra grevê vêşanîye yê bi 3 rojan ame despêkerdene. Çalakwanan da zanayene ke ê do bi aktîvîteyanê cîya cîyayan paştî bidê grevê vêşanîye.

BREMEN

Bajarê Bremenî yê Almanya de zî Kurdistanijan bi çalakîyêk hukmatê Almanya ra waşt ke vera nê qewimîyayîşan bêvêng memano û sucê Tirkîya rê şirîk mebo.

HÎLDESHEÎM

Bajarê Hîldesheîmî yê Almanya de zî  tecrîd ame protestokerdene. Çalakwanê ke saetanê şewî de vejîyayî meydanan sloganê sey “Biciwîyo xoverdayîşê Yuksel Koç û Nasir Yagizî”, “Bê Serekî cuye nêbena” eştî.

MUNÎH

Bajarê Munîhî yê Almanya de zî Kurdistanijan bi çalakîyêk xoverdayîşê grevê vêşanîye rê wayîr vejîyayî.

MONCHENGLADBACH

Bajarê Monchengladbachî yê Almanya de zî aktîvîstanê Têgêrayîşê Ciwanan ê Şorişgêrî çalakîyek organîze kerde. Çalakîya bêîtaatîye ya sivîlî de xoverdayîşê Leyla Guvene û zîndanan ame silamkerdene.

 ATÎNA

Paytextê Yûnanîstanî Atîna de zî bi vengdayîşê KCDK-E’yî Kurdistanijî  meydanan de bî. Çalakwanan paştî daye girevê vêşanîye û bêvêngîya Ewropa şermezar kerde.

 

.