Sendîkaya Girewteyanê Sîyasîyan a Almanya “Gefangenen-Gewerkschaft/Bundesweite Organisation” seba ke paştîdayîş bidê grevê vêşanîye yo ke rayberîya parlamentera HDP’yî Leyla Guvene de dest pêkerd, heme hepisxanayanê Almanya de dest bi çalakîye kerde. Gruba piştîdayîşî seba mehkûman a ke Berlînî de ya bala ente serê binpaykerdişê heqanê merdîman ya hepisxaneyanê Tirkîya û Başûrê Kurdistanî û derheqê çalakîyanê piştîdayîşî de zanayîş da.

Grube mehkûman  waşt ke, tecrîdkerdişê Rayberê Şarê Kurdî Abdullah Ocalanî lezabez bêro wedaritene û da zanayene ke ê bi nê amancî 1 ra heta 3’ê Gucige hepisxaneyanê cîyayan ê Almanya de girewteyî û hukûwerdî kewtî grevê vêşanîye.

Ame musayene ke, endamê sendîkaye yê ke teber de zî seba paştîdayîş bidê çalakîya mehkuman kewtî grevê vêşanîye. Çalakwanan  ard ziwan sîyasetmedar û şoreşgerê ke hepisxaneyanê Tirkîya û Bakûrê Kurdistanî de teyna nîyê û vat, heqê Ocalanî yê ke bi telefonî qiseykerdiş, rojname wendiş, bi nîzam keyeyê xo reyde pêvînayîşkerdiş û televîzyon temaşekerdişî bêrê ca.

'WA TECRÎD BÊRO WEDARITENE’

Sendîkaya Girewteyanê Sîyasîyan a Almanya ard ziwan ke, seba bêvengîya pêroyî ya cîhanî ya ke hemberê grevanê vêşanîye yê ke her cayê dinyaye de dewam kenê, tayê çalakî ameyî destpêkerdene.

Çarçewaya çalakîyan de, mehkûmê hepisxaneyê Chemnîtzî, Neumunster û Rosdorfî, seba wedaritişê tecrîdê Ocalan û seba şîyayîşê Îmraliyî yê CPT’yî , mektubêk Konseya Ewropa rê şawite. Mehkûman mektube de vat, “Ma kamcîn  kultur û cimatî ra benîme bibîme, têkoşînê ma hempar o, ganî nezîkatîyêka merdimî ma hemeyan ra bêra kerdene. Bi nê amancî ganî tecrîdê serê Ocalanî bêro wedaritene.” Mektube bi nameyê Peter Reîtenbach û Sven Herholdî ameye şawitene.

40 girewte û hukmwerê ke hepisxaneyê Tegelî yê Berlînî de yê, mektubêk Rayberê Şarê Kurdî Abdullah Ocalan û sîyasetmedarê Kurdî û şorişgêrê ke hepisxaneyanê Tirkîya de rê şawite. Mehkûm vat, "Şima teyna nîyê."