Girewteyê sîyasî yê ke hepisxaneyanê Almanya de yê, seba ke tecrîdo ke Rayberê Şarê Kurdî Abdullah Ocalanî ser yeno domnayene protesto bikerê û paştdarîye bidê çalakwananê grevê vêşanîye,seba hîrê rojan qerarê grevê vêşanîye girewt.
Sendîkaya Girewteyanê Sîyasîyan a Almanya “Gefangenen-Gewerkschaft/Bundesweite Organisation” seba ke paştdarîye bidîyo Parlamentera HDP Leyla Guvene û çalakwananê grevê vêşanîye yew beyanat da. Sendîka beyanat de bale ante şert û mercanê hepisxaneyan ê Tirkîya û Başurê Kurdîstanî ser û heqê merdimanê ke yenî binpaykerdene îşaret kerdî û seba paştdarîya girewteyan qerarê destpêkerdişê çalakîye îlan kerde.
Sendîka bale ante şert û mercanê hepisxaneyê Îmralîyî ser zî û va Rayberê Şarê Kurdî Abdullah Ocalanî ser o tecrîdêko giran yeno domnayene û kitab û rojnameyî nêdîne ci, heqa xo ya telefonî, keye û avûkatanê xo de pêvînayîş û heqa temaşekerdişê televîzyonî yenî binpaykerdene.
Beyanatê Sendîka wina dewam kerd: “Leyla Guvene seba protestokerdişê tecrîdê tecrîdê Rayberê Şarê Kurdî Abdullah Ocalanî, 8ê Teşrîna Peyêne ra nat grevê vêşanîye de ya û 200 girewteyê bînî zî kewtî grevê vêşanîye. Ma seba ke bêvengîya Almanya bêro şikitene û balê biancîme na rewşe ser, çalakîya paştdarîye danîme destpêkerdene.“
SENDÎKAYA GREWTEYANÊ SÎYASÎYAN A ALMANYA RA PAŞTDARÎYE GREVÊ VÊŞANÎYE
Sendîka do derheqê rewşa hepisxaneyan ê Tirkîya de zanayîşan biyaro rojdem, sefîr û yewîyanê dewlete rê nameyê protestoyî bierşawê, Girewteyanê Kurdan rê nameyan binusnê.
Hetê bînî ra, girewteyê sîyasîyî yê ke hepisxaneyanê Almanya de yê zî bi yew beyanat kerd eşkera ke, ê do 1ê Gucige ra heta 3yê Gucige çalakîya grevê vêşanîye virazî.
