Vera tepişîyayîşê Şaredarê Îstanbulî Ekrem Îmamogluyî nêrazîbîyayîşî dewam kenê. Ney reyde nîqaşê serê têkoşînê hemparî zî yenê kerdene. Sereka Pêroyî ya Partîya Kedkaran a Sosyalîste (SEP) Guneşe Gumuş derheqê operasyonê vera Îmamogluyî û têkoşînê hemparî de ajansê ma rê qisey kerd.

Guneşe operasyonê vra Îmamogluyî sey darbeyêka îqtîdarê AKP-MHPyî pênase kerd û vat: ‘’Mesele hinî Îmamoglu û CHP nîyê. Wina aseno ke ancî weçînayîşan de serkewtişê AKP-MHPyî zehmet o; bi taybetî verê Îmamogluyî e. Coka darbe vera weçînayîşan ameye kerdene.

Darbe do bi tepişîyayîşê Îmamogluyî nêmendêne, do biresayêne tayînê qeyûmî yê seba Îstanbulî. No bi seferberîya girseyî ya pîle ame şiknayene la hema zî na mesele hesas a.’’

Guneşe ard ziwan ke bi operasyonê vera Îmamogluyî îqtîdar wazeno ke DEM Partî partîyêka muxalefetî ra dûr bifîno, şarê kurdî tena war verdo û vat: ‘’Îqtîdar wazeno ke mabênê girseyê DEM Partî û CHPyî û girseyê çepgîri de bêbawerîye biaferno. No operasyon şexsê Îmamogluyî ra zafêr yeno manayêke. Mabênê ma û CHPyî de cîyatîyî est ê la eke darbe ser bikewa rejîmêko otorîter do cabiba û manaya weçînayîşî nêmana. Erkê ma yo lezabez o ke vera na darbe çalakîyê şermezarkerdişî yê xurt û girseyî do bêrê kerdene.’’

Guneşe girîngîya nêrazîbîyayîşê ciwanan nîşan kerde û vat: ‘’Ganî no têkoşîn seke qedîyayo nêro dîyene. Ganî bi rayîr û metodanê neweyan nêrazîbîyayîşî dewam bikerê û bêrê rêxistinkerdene.’’

Guneşe îfade kerd ke wext wextê weriştişê vera faşîzmî yo û vat: ‘’Ganî sendîkayan ra heta partîyanê sîyasîyan û rêxistinanê girseyîyan ê demokratîkan ê bibê yew û têkoşîno girseyî bêro berzkerdene.’’