Kurdistanijî û dostê înan seba protestokerdişê tecrîdê serê Rayberê Şarê Kurdî Abdullah Ocalanî û silamkerdişê grevê vêşanîye yê meydanan de yê.

STUTTGART

Bajarê Stuttgartî yê Alamanya de yew çalakîye ameye organizekerdene. Çalakîye de mektuba ke Leyla Guvene erşawitbî mîtîngê Amedî, bi ziwanê Almankî ame wendene. Wendişê mektube ra dima beyanat ame dayene û bale ancîye serê tecrîdê Îmraliyî  û wina ame vatene: ”. Ganî tecrîdê ser Rayber Ocalanî bêro wedaritene. Leyla Guvene nêheşnena, nêwena, û nêvînena, la reyna zî çapemenîya Almanî de qet ca nêgena. Eke Almanya de yew parlamenter hepisxane de biyene û greve vêşanîye de biyene, şima reyna zî bêveng mendenê gelo?”

LONDRA

Paytextê Îngîlîstanî Londra de zî bi vengdayîşê Meclîsê Cinîyan ê Roje bi seyan cinîyî verê banê BBCyî de ameyî têhet û talebanê Leyla Guvene rê wayîr vejîyayî. Cinîyî xeylî wext verê berê BBcyî de nîştî ro  û bi sloganê “Vizêrî Mandela Ewro Ocalan”, ” Dewleta Faşîst a Tirk”, “Ma pêro Leyla yîme” eştî. Çalakîye ra yew roje avêr BBC de derheqê Leyla Guvene de yew xebere ameybî weşênayene û na xebere de Rayber Ocalanî rê heqaret amebi kerdene. Cinîyan zî çalakîya xo de, seba ke nê protesto bikerê,  bi yew heyet waşt ke îdarekaranê BBCyî de pêvînayîş bikerê. Naye ser polîsan mudaxaleyê çalakîya cinîyan kerd. La cinîyan biqerardarîye çalakîya xo domnaye û polîsan vera na qerardarîye peyser game eşte. Çalakîya roniştişî ya cinîyan 4 saetî dewam kerde. Bi nameye Meclîsê Cinîyan ê Roje Elîf Sariçinare qisey kerd. Sariçinare bale ante rewşa Leyla Guvene û tecrîdê ser Rayber Ocalanî.

DRAGUIGNAN

Bajarê Draguîgnanî yê Fransa de zî  Kurdistanîyan paştdarîye daye xoverdayoxanê greve vêşanÎye yê Leyla Guvene, Strasbourg û Hewlêrî. Kurdîstanîyan rayîrşîyayîş organize kerd û flamayê PKK, postere Ocalanî xo dest de pêgirewtî.

SYDNEY

Bajarê  Syndeyî yê Awusturalya de zî Kurdîstanîyan parlamentoya NSWyî de parlamenterê Partîya Keskan, Jaîme Parker de pêvînayîş kerd. Heyetî derheqê talebanê Leyla Guvene de beyanat da. Parkerî zî va ma do kampanyaya îmzaye bide destpêkerdene û no derheq de parlamento de bale biancê rewşe ser.” Reyna Parkerî va “ez do derheqê tecrîdî û derheqê greve vêşanîye de, Wezîrê Karanê Teberî yê Avusturalya rê mektube binusna.”

ADÎGEY

Kurdê ke Komarê Xoser ê Adîgey ê girêdayîye Federasyonê Rusya de ciwîyenê zî, seba ke tecrîd bêro wedaritene, dest bi greve vêşanîye kerd. Grevê vêşanîye hetê Komela Kulterê Kurdan a Adîgeyî ame organize kerdene û 15 kesî beşdarê greve vêşanîye bîyî. Grev Merkezê Kulturê Kurdan de ame viraştene û endame KNKyî yê Rûsya Feyzo Huseyînî no derheq de wina qisey kerd: ” Tirkîya bi tecrîdê ser Rayberê Şarê Kurdî Abdullah Ocalanî, hiqûqê mîyanneteweyî binpay kena. Qet yew dewlete no derheq de Tirkîya rexne û heşar nêkena. Kurdî bi xoverdayoxîya xo ver ana bêvengîye vejînê. Ma zî sey xoverdayoxan, Leyla Guvene, Nasir Yaxiz, Îlhan şîşî, dest bi greve vêşanîye kenîme. Çalakîya ma do heta serkewtişê Kurdan dewam bikero.”

KRASNÎKUT

Reyna Rusya de Otonomîyê Kultûrê Kurdan ê Krasnîkutî, seba protestokerdişê tecrîdî beyanatê çapamenîye da. Beyanato ke Merkezê Kultûrê Kurdan ê Krasnîkutî de ame dayene û xeylî kesî beşdarê ci bîyî. Bi nameye Otonomîyê Kultûrê Kurdan ê Krasnîkutî serekê Otonomî Ramazan Budakovî qisey kerd. Budakovî va: ‘’Ma tecrîdo ke Tikîya Rayîrber Ocalanî ser domnena qebul nêkenîme. Ma pêro xoverdayoxê ke vera ticrîdî kewtê greve vêşanîye selam kenîme û paştdarîye danîme xoverdayîşê înan. Ma wazenîme ke wa Rusya û hêzê mîyanneteweyî, hîna ke ereyî nîyo bikewê dewre. Tirkîya qirkerdişê Kurdan xo rê kerdo derd û wazena ke Kurdî mebê wayîrê statu û heqan. Rayber Ocalan seba ke azadîya Kurdan wazeno, rastê tecrîdî yeno. La şarê Kurdi do heta azadîya ey çalakîyan rê dewam bikero.”