Bînşewe bajarê Hanau yê Almanya de di kafeyan de hêrişê biçekî ameyî kerdene. Cayê serebûtî de meyîtê 9 kesan ameyî dîyenê û nizdê ci de 2 meyîtê bînî ameyî dîyene. Ame zanayene ke kesê ke 9 kesî kiştî dima şi keye maya xo  kişt û tewr peynî de xo zî kişt.

Macîrê ke ameyî qetilkerdene mîyan înan de 2 ciwanê kurdî zî estê. Çimeyanê heremî yê Hanau ke zanayîş da ANFyî  vat ciwanê bi nameyê Ferhat Unvar û Gokhan Gultekîn zî hêriş de cuya xo vînî kerde. Reyna mîyanê birîndarna de zî 3 kurdî estê.

Hêrişkar Tobias Rathjenî fikrê xo yê nîjadperestî sey hîrê dosyayan înternet de pare kerdî û vat şarê  ke Almanya ra nêerzîyenê teber ganî bêrê çînkerdene.

Serekkomarê Almanya Frank-Walter Stenmeierî hêriş sey çalakîya terorî name kerd. Serekwezîre Angela Merkel zî merdimanê înanê ke cuya xo vînî kerde rê serweşîye waşte û vat: ''Ewro rojanê tewr bidejan ê welatê ma  ra yo. Nijadperestîye axuyêko çi heyfo ke no axu komelê ma de esto. '' Hemsereka Partîya Çepe Katja Kipping zî  bale ante polîtîkaya nîjadperestîye ser  vat: ''Wir trauern-Yas tutuyoruz- Em xemgîn in''.

No mabênê de semedê şermezarkerdişê hêrişî sere de Hanau ewro xeylêk bajaranê Almanya de saete 18:00 de do çalakîyî bêrê kerdene.