Paytextê Avusturya Viyana de Hewteyanê Festîvale dest pêkerd ke heta 23yê hezîrane do dewam bikerê. Şorişê Cinîyan ê Rojawanî ame selamkerdene. Çarçewa festîvale de tîyatro, opera, muzîk, reqs, performans, hunerê bînî û aktîvîzmê 46 produksîyon û projeyê hunerî do bêrê mojnayene.

Hezar kesî beşdarê festîvale bîyî. Hemsereka Têkilîyanê Teberî yê Îdareyê Xoserî yê Rojawanî Îlhame Ehmed bi qiseykerdişê xo festîvale akerd. Îlhame Ehmed vat: ''Ma Rojawanî ra, cayê şorişî ra şima selam kenê. Ma hêvîdar ê ke şima do seba vilabîyayîşê kulturêkê demokratîkî û azadîya cinîyan bibê hêzê îdarekerdişî.''

Enstîtuyê Jineolojî yê Brukselî ra Sarahe Mancha festîvale zîyaret kerde. Necîbe Qeredaxî zî Peymana Komelkî ya Îdareyê Xoserî ser o semînerêk da. Seba ke vîze nêdîyaya înan Rehane Temo û Remzîye Mihemed nêeşkayî tewrê semînerî bibê.

Necîbe qalê modelê Rojawanî, hêrişanê dewleta tirke kerd.

Sarahe Marcha vat: ''Rayberê Şarê Kurdî Abdullah Ocalanî  vera îşxalê Kurdîstanî karê bêhempayî kerdî.''

26ê gulane de zî festîvale de atolyeya ''Şorişê Rojawanî de Sîstemê Cinîyan'' do bêra kerdene û Sarahe Marcha tîya de cabigêra.