Eyaletê Hessenî de roja çarşemeyê verênî de 9 koçberî hetê faşîstêkê almanî ra ameybî qetilkerdene ke înan ra 5 kesî kurd bîyî. Heman eyaletî de vizêr almanêko rastgîr bi wesayîtê xo kewt mîyanê karnavale.

Serebût vizêr bajarekê Vokmarsenî ya şaristanê Kasselî de wextê Karnavala ''Dişemeyê Vilikan'' de ame meydan. Almanêko 29 serre bi wesayîtê xo kewt mîyanê merasîmê karnavale û temamîya înan domanî 30 kesî birîndar kerdî. Goreyê xeberanê ke hetê polîsan û selahîyetdaran ra ameyî dayene, rewşa çend birîndaran giran a. Şahîdanê serebûtî medyaya almanan reyde qisey kerd û pare kerd ke dima ke wesayît kewt mîyanê karnavale bi 30 metreyan şîyo û dima vindert.  Vervatoxêkê polîsan ajansê DPA reyde qisey kerd û da zanayene ke tehqîqat ''hêrişî'' ser o ney ''çalakîyêka bi zanayîşî'' ser o yeno kerdene. Serebûtî ra dima karnavalê Eyaletê Hessenî pêro ameyî batalkerdene.