Bajarê Aalstî yê Belçîka de 19 û 20 nîsane de welatanê cîya cîyayan ê Ewropa ra rojnamegerê kurdî ameyî têhet û kombîyayîşê di rojan kerd. Netîceya maqeşeyan de yê ke pêro bi kurdkî ameyî kerdene, Kolektîfê Kedkaranê Çapemenîye yê Kurdîstanijan ê Ewropa ame ronayene.

Kombîyayîş ame vatene ke bitaybetî wextê medyaya dijîtalî de gerek medyaya kurdan goreyê şertanê neweyan têbigêro û na çarçewe de rêxistinkerdişê xo xurtêr bikero. Reyna ame vatene ke rolê medya têna îfşakerdiş nîyo gerek eynî wextî de bedilnayîş û înşakerdiş zî bikero. Kombîyayîş de bale ameye antene tecrubeyê cinîyan ser ke warê medyaya kurdan de pêser kerdo.

Rojnameger Gulîstane Îke pêşnîyaz kerd ke seba ke kurdî tecrubeyê xo pare bikerê wa akademîya medya ya online bêro ronayene.

Kombîyayîş de Kolektîfê Kedkaranê Çapemenîye yê Kurdîstanijan ê Ewropa (Kolektîfa Medyakarên Kurdistanê li Ewropa) ame ronayene. Seba ke komele xebetanê kolektîfî rayra bêro 11 kesan ra komîteyêke ameye ronayene. Komîte de çar cinî û 5 camêrdî ca genê û di kesê bînî do peyra tewrê ci bîbê. Na komîte do semedê ronayîş û îlankerdişê komele konferansêkê hîra organîze bikero.

Peynînameyê kombîyayîşî de nê ameyî vatene:

''Kurdî bi seserran o ke têkoşînê azadîye rayra benê. Nê têkoşînî de bêşik tesîrê medaya kurdan zaf o. Ronayîşê rojnameyê Kurdîstanî ra nata kurdan warê medyaya de bedelê girdî dayî û destkewteyê girdî fînayî dest. Ewro çar hetanê dinya de bi desan kanalê televîzyon, bi seyan rojname û kovarê  kurdan û kurdîstanijan est ê. Reyna kurdan torranê medyaya dîjîtale de zî cayê xo girewto. Na çarçewe de serranê peyênan de bitaybetî Ewropa de hetê rêxistinkerdişî ra tay xebetî ameyî kerdene la nê qîm nêkenê. 19 û 20ê nîsane de temsîlkarê dezgehanê medyaya û rêxistinanê kurdan bajarê Aalstî yê Belçika de ameyî têhet. Nê konferansî de medyaya kurdan û rojnamegerîya ci bi hewayaêkê hîra ameyî munaqaşakerdene. Kombîyayîş de xeylê rexne û pêşnîyazê erjîyayî ameyî kerdene.

Konferansê 19 û 20ê nîsane de nê qerarî ameyî girewetene:

-Semedê rêxistinkerdişî Bruksel de bi nameyê Kolektîfa Medyakarên Kurdistanê li Ewropa do komelêka fermî bêro ronayene.

-Qeqrar ame girewtene ke semedê rayraberdişê xebatanê komele komîteya 11 kesan bêro ronayene.

Nê kesî semedê îdareyê komîte ameyî vîjnayene:

-Amed Dicle, Gulistan Çiya İke, Hidayet Îbrahim, Diyar Ezîz Şerîf, Roni Eylem, Niyaz Abdullah, Rojda Delal, Mahir Uzmez, Maxime Demiralp. 

-Komîte wayîrê înîsîyatîfî yo û eşkeno di kesanê bînan tewrê heyetê îdareyî bikero.

-Îdareyê Komîte heta konferansê ronayîşî yo ke do  tewr erey heta  payîzê 2025î bêro kerdene, wayîrê înîsîyatîfo ke xebatanê qerar û munaqeşeyanê Konferansê Aalstî rayra bêro.''