Menga Gulane de weçînayîşê Parlamentoyê Ewropa do bibo û weçînayîşî ra ver, partîyanê muxalefetî yê Almanya ra Partîya Çepe kongreya xo viraşte. Kongre de seba Parlamentoyê Ewropa namzetî û programê weçînayîşî  ameyî kifşkerdene. Partîya Çepe, HDP’yî ra yew heyet zî dawetê kongreye kerd.

Hemsereka Şaredarîya Cizîre ya ke tayînkerdişê qeyûmî ra dima wezîfe ra ameya girewtene û parlamanterê HDP’yî yo verên Ertugrul Kurkçu heyetê HDP’yî de bî. Kongreye di rojî dewam kerd. Îmrete nika temsîlkarîya HDP’yî ya Almanya zî kena û Kongreye de bi nameyê heyetê HDP’yî qiseykerdişêk kerd. Îmrete bale ante xoverdayîşanê grevê vêşanîye yê ke seba ke tecrîdê serê Rayberê Şarê Kurdî Abdullah Ocalanî bêro wedaritene ser û waşt ke wa paştarîye bidîyo grevanê vêşanîye.

Îmrete derheqê rewşa weşîye ya Leyla Guvene de zanayîşî dayî û muhîmîya şikitena tecrîdê Îmralîyî ser o qisey kerd. Îmrete ard vîrî ke sey  ci xeylî sîyasetmedar, şaredar, rojnameger û akademîsyenî, surgun de nêçar mendê û reyna sey Selahattîn Demîrtaş û Fîgen Yuksekdage, xeylî sîyasetmedar û xebatkarê partîye zî hepisxaneyan de yê.

PLANÊ ÇALAKÎYAN O HEMPAR

Îmrete va: ”Seba ke mucadeleyo hempar bêro dayene ez tîya ya. Xora tîya de bîyayîşê mi zî hêz dano mi. Paştdarîye, mucadeleyê vera faşîzmî de, çeko tewr pîl o.” Îmrete hukmatê Almanya yê Federalî ra waşt ke wa sîyasetê xo yê krîmînalîzekerdişê Kurdan terk bikero. Reyna Îmrete bale ante ser û va AKP Tirkîya de Kurdan rê se kena, Almanya zî Kurdanê Almaya rê bi eynî ferasetî têgêrena û seba ke no sîyaset bêro vurnayene, Partîya Çepe ra paştdarîye waşte.

Temsîlkara HDP’yî ya Almanya Îmrete peynîya qiseykerdişê xo de bale ante weçînayîşê 31’ê Adare yê herêmîyan ser û waşt ke wa Partîya Çepe heyet bierşawo û weçînayîşî ca de teqîb bikero. Qiseykerdişê Îmrete ke qedîya, îdarekar û delegeyê Partîya Çepe rawiştî payan ser û ci rê çepikî dayî piro. Îmrete û Kurkçuyî kongreye de, îdarekaranê Partîya Çepe de pêvînayîşî kerdî.

Temsîlkarê HDP’yî hemserekê verî yê Partîya Çepe Gregor Gysî û hemsereka Partîya Çepe Katja Kîppînge reyde ronîştî û derheqê grevanê vêşanîye û rewşa peyêne de zanayîşî pare kerdî. Îdarekaranê Partîya Çepe va HDP partîya doste ya û seba ke çalakîyê grevê vêşanîye Almanya de bikewê rojdem, HDP’yî reyde do çalakîyanê hemparan bivirazê.

Nê mabênî de seba Parlamentoyê Ewropa Ozlem Alev Demîrele û Martîn Schîrdewan, kongre de sey namzet ameyî weçînayene.