Vizêr Konseya Ewropa de, derheqê grevê vêşanîye yê Leyla Guvene û derheqê Tirkîya de raporêk ame tesdîqkerdene. Rapor de qerarê peşnîyazkerdişê wedaritişê tecrîdê serê Rayber Abdullah Ocalanî ame girewtene.
Meclîsê Parlamenteran ê Konseya Ewropa de vizêr derheqê Tirkîya de raporyêk ame testîqkerdene. Rapor de ame vatene ke ganî sere de Leyla Guvene heme tepişteyê sîyasî serbest bêrî veradayene.
Hetî bînî ra, seba Raybere Şarê Kurdî Abdullah Ocalanî yew madeyo newe îlaweyê rapore kerd. No madeyo îlawe wina yo:“Konseya Ewropa, derheqê Abdullah Ocalan û Hepisxaneyê Îmralîyî de peşnîyazanê Komîteya Vernîgirewtişê Îşkenceyî (CPT) teqîp keno“
CPT 2016î de Îmralî zîyaret kerdibi û derheqê zîyaretî de 20ê Adare 2018î de rapor a xo kerdibi eşkera. Rapore, zîyaret ra 2 serrî pey amebi eşkerakerdene û bale ancîyabî ser ke Ocalanî 5 serrî yo ke avûkatanê xo de, 18 mengî yo keyeyê xo de pêvînayîş nêkerdo.
Rapor de amebi vatene ke, Ocalan û girewteyê hepisxaneyî yê bînî, heqanê xo yê telefon û zîyaretî ra ameyê mahrumkerdene û amebi vatene ke wa na rewşe bêro vurîyayene.
CPTyî rapora xo de waştbi ke wa Ocalan yew menge de tewr tay ganî di dolimî bivejîyo teber û heqê xo yê telefonî bişuxulno, keye û avûkatanê xo de pêvînayîş bikero.
