Bordeaux

Şaristanê Bordeauxî yê Fransa de rayberîya ciwanan de çalakîyêka rayraşîyayîşî ameye kerdene. Çalakîye de peymana PDK-Iraqî ya serê Şingalî û tecrîdê vera Rayberê Şarê Kurdî Abdullah Ocalanî ameyî protestokerdene.

Paris

Kurdîstanijan bi pankart û sloganan çalakîyêka rayraşîyayîşî kerde û peymana serê Şingalî protesto kerde.

Stockholm

Paytextê Swêdî Stockholm de bi beşdarîyanê xeylêk kesayet û dezgehanê kurdan Peymana Iraq-PDKyî ameye protesto kerdene. Çalakîkeran venga hukmatê Swêdî da ke paştî bido Şingalî.

Basel

Şaristanê Baselî yê Swîsre de kurdan û dostanê înan nawnayîşêk kerd û mesajê paştdayîşî da.

Cenevre

Kurdîstanijan çalakîya xo de peymana serê Şingalî protesto kerde û da zanayene ke na peymane verê qirkerdişan ê neweyan akena.

Zurih

Şaristanê bînî yê Swîsre Zurih de kurdan bi nawnayîşêk peymana PDK-Iraqî protesto kerde û îfade kerd ke ê do statuyê Şingalî bipawê.

Kiel

Şaristanê Kielî yê Almanya de bi çalakîyêke peymana serê Şingalî ameye şermezarkerdene. Çalakîye de posterê Rayberê Şarê Kurdî Abdullah Ocalanî ameyî kiriştene.

Saarbrucken

Şaristanê Saarbruckenî yê Almanya de vera îşxal û peymana Şingalî nawnayîşêk ame kedene. Nawnayîş de sloganê set 'Biciwîyo xoverdayîşê Şingalî' û 'Biciwîyo Serek Apo' ameyî vatene.

Lorient

Şaristanê Lorientî yê Fransa de kurdîstanijan çalakîyêka rayraşîyayîşî kerde û paştî daye şarê Şingalî. Çalakîye de vera peymana PDK-Iraqî ya serê Şingalî vilawekî ameyî vilakerdene.

Kopenhag

Şaristanê Kopenhagî yê Danîmarka de rayberîya cinîyan de peymana serê Şingalî ameye protestokerdene. Kurdîstanijan venga Neteweyanê Yewbîyayeyan û hêzanê mîyanneteweyîyan da ke seba Şingalî wezîfeyê xo bîyarê ca.

Rennes

Kurdîstanijan şaristanê Rennesî yê Fransa de bi pankarta 'Şingal ê êzidîyan o' peymana PDK-Iraqî protesto kerde.

Mantes-la-Jolie

Şaristanê bînî yê Fransa  Mantes-la-Jolie de zî kurdan vera peymana serê Şingalî çalakîyêka protestoyî kerde. Çalakîye bi slogananê 'Bimiro îxanet' û 'Biciwîyo xoverdayîşê Şingalî' qedîyaye.