London de Komployê 15ê Sibate ame protestokerdene

Paytextê Brîtanya London de bi seyan kurdî ameyî têhet û înan serrgêra 21. ya Komployê Mîyanneteweyî ya 15ê Sibate ya vera Rayberê Şarê Kurdî Abdullah Ocalanî bi rayraşîyayîşêk û nawnayîşêk protesto kerd.

Rayberîya Meclîsê Şarî yê Kurdî de bi seyan kesî verê bînaya BBC Londonî de ameyî têhet, pankarta ''Seba Ocalanî azadîye, seba Kurdîstanî statu'' akerde û fotografê Ocalanî, alayê YPG, YPJ, PYD û PJAKî berz kerdî.

Çalakîye de sloganê ''Bimiro Komployê 15ê Sibate'', ''Biciwîyo Serek Apo'', ''Lovely Ocalan'' û ''Vizêr Mandela ewro Ocalan'' ameyî vatene. Dima Înîsîyatîfê Azadîya Ocalanî eşkerayîyêke daye û vat: ''Huqûqo mîyanneteweyî seke çin o wina ame hesibaneyene û hêzanê komplogeran Rayber Apo teslînê dewleta tirke kerd. Ocalanî Îmrali de xoverdayîşêko pîl kerd û paradîgmaya komelî pêşkêşê Rojhelatê Mîyanênî kerd.''

Meclîsê Şarê Kurdî ra Ahmet Muslumî qisey kerd û vat: ''Rayber Apoyî bi hawayêkê fîzîkî ma ra ame dûrvistene. La ewro projeyê ci Konfederalîzmê Demokratîkî yê Rayberîye Rojhelatê Mîyanênî roşnî keno. Reyna ma vanê ke şima nêeşkenê roja ma tarî bikerê.''

Vervatoxê Komîsyonê Keyeyanê Şehîdan ê Meclîsê Şarî yê Kurdî Alî Pyrozî zî vat: ''Kurdî nê komployî qet qebul nêkenê û komplo şermezar kenê.''

Qiseykerdişan ra dima girseyê şarî rayîrî ra şi. Rayraşîyayîş de bêmabên sloganê ''Ocalanî'' ame vatene. Rayraşîyayîş Meydanê Trafalgarî de qedîya.