MCDK’yî û Meclîsanê Cinîyan ê Ewropa zaf bajaran de kongreyê xo viraştî.

NURNBERG: Bajarê Freîbûrgî yê Almanya de, MCDK'yî kongreya xo ya 5’ine ya asayîye viraşte.  Xoverrodayoxê grevê vêşanîye yê Strasboûrgî ra Ramazan Îmîrî bi rayîrê telefonî beşdarê kongre bi û vat, “Hewcedarîya tewr girda nê prosesî xoverrodayîş o. Ma bawer ê ke bi na kongre şima do xoverrodayîşî xurtir bikerê û verê xo bidê serkewtişî.” Peynîya kongre de hemserekî û seba meclîsî zî 42 kesî ameyî weçînayene.

MANNHEÎM: Mannheîm de zî kongreya 6’ine ya MCDK'yî ameye viraştene. Dimayê ercnayîşê roporê karê serre, seba  komîsyonî 11 û seba meclîsî zî 51 kesî ameyî weçînayene. Kongre de peyamê xoverrodayîşanê grevê vêşanîye yê Strasboûrgî ameyî wendene.

BERLÎN: Meclîsê Cinîyan Dest-danî kongreya xo ya asayîye viraşte. Kongre de rayberanê têgêrayîşê cinîyan ra Armanc Goşkar a ke menga Hezîrane de Wareyê Pawitişî yê Medya de şehîd kewtebî, ameye yadkerdene. Peynîya kongre de Zelîha Işike, Jiyan Kayaye û Leyla Rojavaye seba vervatoxîya meclîsê cinîyan ê Dest-danî ameyî weçînayene.

DORTMÛND: Meclîsê Şarî yê Demokratîkî Dortmûnd de kongreya xo viraşte. Xoverrodayoxê grevê vêşanîye yê Hewlerî Nasir Yagizî bi veng peyamêk kogreye rê şawite. Yagizî ard ziwan ke bi xurtbîyayîşê têkoşînê şarê Kurdî yê Vakûrê Kurdistanî û bi xoverrodayîşê Kurdanê Ewropa reyde çalakîye do ser bikewa. Endamê KNK'yî Maşallah Ozturkî zî bale ante serê xoverrodayîşê grevê vêşanîye û ard ziwan ke na çalakîye zaf pîroz a. Orhan Kop û Ayten Karabulute reyêna seba hemserekê Meclîsê Şarî yê Dortmundî ameyî weçînayene.

OFFENBACH: Meclîsê Şarî yê Offenbachî kongreya xo ya 6’ine viraşte. Beşdarbîyayoxê kongreye bêvengîya CPT’yî û Konseya Ewropa ya vera tecrîdî şermezar kerde. Peynîya kongreye de Îbo Ocalanî û Yasemîn Kayrane seba hemserekîye ameyî weçînayene.

HALLE: Bajarê Halleyî de zî kongreya 2’ine ya MCDK’yî ameye viraştene. Dimayê ercnayîşê rewşa sîyasîyî, Aynur Ozcane û Hacî Altune seba hemserekîye ameyî weçînayene. Kongre de Meclîsê Şarî yê Demokratîkî yê Halleyî yo ke 47 kesan ra yeno pê ame îlankerdene.

EÛSKÎRCHEN: MCKD’yî bajarê Eûskîrchenî yê Almanya de bi beşdarbîyayîşê 80 delegeyan kongreya xo ya 3’ine viraşte. Nurî Eren û Hedîye Narmane bîyî hemserekê MCDK'yî.

MUNCHEN: Komuna Jinê-Sara ya Munchenî bi slogana “Ma tecrîdî bişiknê, faşîzmî birijnê, Kurdistanî û Serek Apoyî azad bikerê” kongreya xo ya 3’ine viraşte. Kongre de mektuba Leyla Guvene ya ke TJA'yî rê şawita ameye wendene û peynî de zî hemvervatoxî û endamê komîsyonî ameyî weçînayene.

AÛRÎCH: Bajarê Aûrîchî yê Almanya de zî kombîyayîşêkê şarî ame viraştene û kombîyayîşî de rewşa peyên a Kurdistanî û Rojkewtena Mîyanêne ameye ercnayene. Qiseykerdoxan bale ante serê muhîmîya wayîrvejîyayîşê xoverrodayîşê grevê vêşanîye.

HÎLDESHEÎM: Hîldesheîmî de zî MCDK'yî kongreya xo ya 6'ine viraşte. Peynîya kongre de Şêx Îskender Torba û Hatîce Gonene bîyî hemserekê MCDK’yî yê Hîldesheîmî.

PARÎS: Meclîsê Şarî yê MCDK’yî yê Parîsî, kongreya xo ya 6'ine ya asayîye viraşte. Kongre de xoverrodayîşê grevê vêşanîye yê ke rayberîya hemsereka KCD'yî Leyla Guvene dest pêkerdê ameyî silamkerdene. Dimayê qiseykerdiş û wendişê peyaman weçînitiş ame kerdene û Sanîye Tûnçe û Necmettîn Demîralî reyde bi weçînitişê 41 kesan meclîs ame pê.

DRANCY: Banlîyoya Drancyî ya paytextê Fransa Parîsî de, Meclîsê Cinîyan ê Zîne kongreya xo ya 4'ine viraşte. Kongreya ke bi beşdarbîyayîşê 45 delegeyanê cinîyan ameye viraştene, kongre dîyarîya hemsereka KCD'yî Leyla Guven a 110 rojî yo grevê vêşanîye de ya kerde.

BORDEAÛX: Bajarê Bordeaûxî de zî Meclîsê Şarî yê MCDK'yî kongreya xo ya 5’ine organîze kerde. Hemserekê Cimatê Demokratîkî yê Kurdî yê Fransa (CDK-F) Vedat Bîngolî kongre de qisey kerd û vat, “Ganî ma her cayê Fransa de bibê vengê çalakwananê grevê vêşanîye, xoverrodayîşî gird bikerê û faşîzmî birijnê.” Peynîya kongre de Bedîa Hasane û Mehmet Aktaş seba hemserekîye ameyî weçînayene.

RENNES: Bajarê Rennesî de Meclîsê Cinîyan ê Sara Sêve yê Komela Cinîyan a Zîne, kongreya xo ya 4’ine ya Asayîye viraşte. Duygu Erole û Nedret Budancamanak bîyî hemserekî û meclîs 5 komîsyonan û 32 kesan ra ame pê. Kongre de qerar ame giretewtene ke Rennesî de kooperatîfêk cinîyan bêro awankerdene.

BÎEL: Bajaranê Bîel, Solothûrn, St. Gallen û Lûzernî yê Swîsî de Cimatê Demokratîkî yê Kurdî (CDK) kongreya xo viraşte. Lozan de zî Meclîsê Cinîyan yê Lajîne kongreya xo viraşte. Kongre de ame zaneyene ke heta waştişê Leyla Guvene bêro qebulkerdene, Kurdistanijî Ewropa de, bi taybetî Swîs de bi ruhê seferberîye wereyan de bê.

LÛZERN: Bajarê Lûzernî yê Swîsî de Meclîsê Cinîyan ê Arîn Mîrkane, Meclîsê Cinîyan ê Lajîne yê Lozanî, Meclîsê Cinîyan ê Rojbîne yê Aaraûyî, Meclîsê Cinîyan ê Bêrîtane yê Zurîchî û Komuna Cinîyan a Pinare ya Solothurnî, kongreyê xo yê serre bi slogana “Cinî bi xoverrodayîş azad benê” viraştî.