2017 de tîmêka dewleta tirke vera Hemserekê KNKyî Remzî Kartal û Endamê Konseya Rayberdişî ya KCKyî Zubeyîr Aydarî xîretê suîkastî kerdbi. Roniştişê bire yê dewaya vera tîma suîkastî 11ê adare de amebi kerdene û dîyabî zanayene ke bire 22ê aşme de do bêra eşkerakerdene la ewro bire ameye eşkerakerdene.

Aydar, Kartal û Avûkat Jan Fermon tewro bira roniştişî bîyî. Mehkeme bi bahaneya 'delîlê qîmî çin ê û MÎT rêxistinêka terorî nîyo' pêro endamê tîma suîkastî vera dayî. Balkêş o ke pawitiş de polîsanê Fransa zî tîme bêsûc mojnaye.

Avûkat Fermonî derheqê bire de ANFyî rê qisey kerd û vat: ''Ma hema detayî tam nêzanenê la dadger pê hesîyayo ke çîyêk qewimîyayo. La dima dadgerî pêro delîlan ser de 'şik' na ro. Dadgerî bi qiseyê 'Polîsî vanê delîlêkê qîmî çin o' na bire daye.''

Dosyaya dewa de delîlî est ê ke Zekerîya Çelîkbîlek seba îstîxbaratê Fransa û Tirkîya xebitîyeno û 2013 de Qirkerdişê Parisî de rolê ci est o. Goreyê Fermonî seba ke Fransa naye qebul nêkena tesîrê 'bombaya nuklere' do biqewimîyo.

Fermonî vat: ''Mehkeme vat 'MÎT rêxistinêka terorî nîyo.' Mehkeme bi nê qiseyî waşt na dewa xo ser ra bierza. Na bire serî ra heta binî sîyasî ya. Dewayêka bîne de nê delîlî qetî mehkumîyet dayêne.''

Aydarî îfade kerd ke cara dozger destpêkî ra nata waştêne înan vera bido û vat: Netîceya şerê Ukrayna de seba têkilîyanê Fransa û Tirkîya na bire dîyaye. Ma do îtîraz bikerê û heta peynî şorê.''

Remzî Kartalî zî vera bire nêrazîbîyayîşê xo mojna û vat: ''Na bire sîyasî ya, nêna qebulkerdene. Ma do îtîraz bikerê.''