Mîtîngê Strasbourgî: Ma do Rayberîya xo azad bikerê!

Mîtîngê Strasbourgî de Hemserekê KONGA-GELî Remzî Kartalî vat: ''Serra 2020î semedê ma serrêka stratejîk a.'' KJKyî zî vat: ''Ma do semedê azadîya Rayberîya xo  her cayî bikerê warê têkoşînî.''

Kurdîstanijî û dostê înan bajarê Strasbourgî yê Fransa semedê şermezarkerdişê Komployê 15ê Sibate yê vera Rayberê Şarê Kurdî Abdullah Ocalanî  de ameyî têhet. Badê rayraşîyayîşî mîtîng de komplo û tecrîd ameyî şermezarkerdene.

Qiseykerdişê akerdişî bi nameyê CDK-Fyî hetê Feyzîye Erdemcî û Lokman Konarî ra ame kerdene. Hemserekê KONGA-GELî Remzî Kartalî mîtîng de qisey kerd û mesajê KJKyî ameyî wendenê. Reyna bi nameyê heyetê Îmraliyî Julie Ward, îdareyê Rojawanî, çalakwananê rayraşîyayîşê dergî, KCDK-E, FEDA-, TJK-E, TEV-ÇANDî zî qiseykerdişî ameyî kerdene.  Maya Heverîne Xelef zî mîtîng de xitatê şelîgî kerd.

Hemserekê KONGA-GELî Remzî Kartalî bale ante ke rixmo ke Ocalan 21 serrî yo binê tecrîdî de yo xoverdayîşêko xurt dano û vat:  ''Komplokeran waşt ke Rayber Apoyî esîr bigêrê ke têgêrayîşê azadîye çîn bikerê û projeyanê xo yê Rojhelatê Mîyanênî bêrê caardene la Rayberê ma planê înan bi paradîgmaya xo pûç vetî. Şarê sey tim do ewro ra tepîya zî vera komployî têkoşîn bikero. Rayber Apoyî reyna şarê kurdî wurizna payan ser. Hêzanê komplokeran no qebûl nêkerd û komplo vist dewre. Qerarê Mehkemeya Belçîka yê PKKyî esto. Ma do emser Ewropa de hetê sîyasî û dîplomasî ra têkoşînê xo hîna xurt bikerê. Serra 2020î semedê ma serrêka stratejîk a, ma do semedê şikitişê tecrîdê serê Rayber Apoyî û azadîye û statuya Kurdîstanî têkoşînî xurt bikerê.''

KJK yî zî bi mesajêk şehîdê Şima Nêeşkenê Tîja Ma Tarî Bikerî yad kerdî, çalakwanê rayraşîyayîşê dergî silam kerdî û vat: ''Ma do semedê azadîya Rayberîyê xo  her cayî bikerê warê têkoşînî. Ma reyna soz danê ke ma do Rayberîya xo azad bikerê.''

Mîtîng de hunermendî bi nameyê Zarîfe, Dîlan, Ozan Şemdîn, Xemgîn Bîrhat, Îdrîs Bagog, Ozan Rêber, Amele, Ozan Emekçî, Kawa, Urmiye, Bengî Agirî, Mehmedê Hezexî, Rojhilat Cemal, Zahir Loran, Ozan Cevatî zî bi deyîranê xo reng da mîtîngî.