Kombîyayîşî seba vîrameyîşê şehîdan ê têkoşînê azadîye û qirkerdişan bi deqayêkê rêzgirewtişî dest pêkerd.

Sîyasetmedarê kurdî Şenol Hanî vîrameyîş de qisey kerd û wina vat: "Mereş de kurdê elewîyî bi zanayîşî ameyî qirkerdene, polîtîkayê înkarî û keçkerdişî ameyî kerdene. No polîtîkaya fermîye ya senteza Turk-Îslamî ya Fermana Islaxatê Şarkî mojneno."

Qirkerdişê Mereşî mabênê 19-26ê kanûna 1978î de ame kerdene. Goreyê doneyanê fermîyan qirkerdiş de 111, goreyê çimeyanê kurdan tewr tay 500 kesî ameyî qetilkerdene. Qirkerdiş de 210 keyeyî û 70 cayê karî ameyî talankerdene. Kurdê elewîyî û şorişgêrî hedefê qirkerdişî de bî.

Qirkerdişê Roboskî 28ê kanûna 2011î de netîceyê bombaeştişê teyarayanê şerî yê artêşa tirke de ame meydan. Hêriş de raşta raşt sivîlî ameyî hedefkerdene û 19ê înan domanî bi temamî 38 dewijî ameyî qetilkerdene.