Muftîtîya Tuncelî Zanîngehê Munzurî de Merkezê Ciwanan ê Hz. Elîyî yê Dîyanetî û Merkezê Ciwanan ê Hz. Fatima û Kursê Quranî yê Ehlî Beytî akerdbî.

Dezgeh û rêxistinanê elewîyan ê sey AABF, AABF Hessen, ADEF, Gustaburg AKM, Frankfurt AKM, Maînz AKM, Hattersheîm AKM, Koblenz AKM, Bad Homburg AKM, CHP Hessen, Hoch Taunus AKM, Russelsheîm, Keyeyê Kulturî yê Frankfurtî, Merkezê Komelê Kurdan ê Demokratîkî, BÎR-KAR û Komeleya Kizilirmakî vera xîretê Muftîtîya Tuncelî şaristanê Russelsheimî de çalakîyêka protestoyî kerde.

Çalakîye de pankartê sey 'Dêrsim de sentezê asîmîlasyonê Îslam-Tirkî rê ney', 'Ma Zanîngehê Munzurî de muftîtîye nêwazenê' ameyî akerdene.

Çalakîye de Alî Kadîr Tanriverdîyî eşkerayîya hempare wende. Tanriverdîyî pare kerd ke Osmanîyan ra nata Dêrsim hedefê polîtîkayanê asîmîlasyonî de yo.

Pîr Huseyîn Bîldîkî zî mîtîng de bale ante ser ke polîsanê tirkan hêrişê cenazaya Aysele Dogan kerdo û vat: ''Dêrsim meskenê elewîtî yo, elewîyan o. Ewro polîsan hêrişê kênaya serewedaritoxe ya Dêrsimî Aysele Dogan kerd. Aysela ma cayê co cenet bo, ruhê to şad bo. Ma Dîyanetî rê heqê xo helal nêkenê, adirê înan wa hewna nêşoro û ziwanê înan lal bibo.''

Mîtîng de hunermend Ferhat Tunçîç zî qala polîtîkayanê asîmîlasyonî û qirkerdişî yê vera Dêrsimî kerde. Mîtîng pê sloganan qedîyaye.