Sirri Sureyya Onderî bi nasnameyê xo yê sîyasetmesar, roşnvîrî, bi tecrubeyê xo yê entelektuelî, bi mîzahê xo û bi taybetmendîyanê xo yê bînan heqê cuye dayêne.

O sinifa xizanan ra amebi, qaldê ey ra o bi ‘mertebeya sêwirîye’ bibi pîl, qijîya xo de bîyo sosyalîst, ciwanîya xo de zîndan de tepişîyabi, dezgehanê îşkenceyî ra derbaz bîyo û peynîya emrê xo de serekwekîlîya Meclîsî kerdo. Ey kamcî gure kerdibi zî bi qîmî kerd, o dekewt cuya her beşê komelî û merdiman ser de rêçê xo verda.

O meseleyanê Tirkîya ya tewr giranan ra meseleya kurdan de zî bi wayîrê tesîrî. O sey temsîlkarê şarê tirkmenan û tradîsyonê Baba Îshaqî tim hetê kurdan de vindert. O her warî de qiseyê xo qîra, bedeldayîşî ra xo apey nêgirewt, kuçeyan ra heta meclîsî her ca de peyê haştîye de bi.

Rixmê nêweşîyanê xo yê giranan zî ey îmzayê xo eştî xîretanê haştîye. Ey prosesanê çareserîya meseleya kurdan de rolêko aktîf girewt xo ser. Bêtelahîya Sirri Sureyya Onderî a bîye ke o Tirkîya de ciwîyayo. Wayîranê îqtîdarî erjêko winayên heba kerd. Ey rixmê her çî zî tradîsyonê xoverdayîşî rê dewam kerd. O bi Musaya haştîye. Ey bara çareserîya meseleya kurdan girewte milê xo. 

Tevrat de hîkayeya Musayî bi detayan yena vatene. Emrê Musayî qîm nêkerd ke bireso erdê sozdayeyî. Hîkayeya Onderî zî bineyk manena ney. Onderî rixmê bedelanê giranan û dejanê giranan zî serkêşîya muxatabîya mesele kerde. Ey sey Musayî fek tira nêverda û heyf ke verî ke haştîye bivîno na dinya ra koç kerd.

Sirri Sureyyayî sey fedayîyê haştîye û şehîdê verênî yê haştîye xo rê mertebe dîye. Ey zerrî û mil daye haştîye. Nika wext wextê wayîrvejîyayîşê vîrameyîşê ey o. Ganî ma ala Onderî bigêrê, hêvîyanê ey bîyarê ca.

Wext ameyo ke hêvîyê haştîye biresê cayê xo û meseleya ke kangren bîya biqeda. Seba hûrmetê vîrmayîşê Sirri Sureyya Onderî seba ke haştîye bêra caardene ganî destî ra çi bêro, bêro kerdene. Her çiqas mergê Onderî vengîyêka pîle viraşta zî ganî ziwan, metod, feraset û wijdanê Sirriyî cade bi serkewtişî bêro tacîdarkerdene.

Nê rojanê şînê Sirriyî de viraştişê cumle zî zehmet bîyo. Ma mîyanê dejêkê giranî de yê. Wa sereyê keye, embazanê ey û şaran weş bo. Wa cayê ci werteyê gul û nûrî de bo. Ti do tim sey ‘’Na dinya de yew Sirri est bi’’ zerrîya ma de bibî.