Dêrsim de serkêşîya Platformê Kede û Demokrasîyî yê Dêrsimî de qûrbanê Terteleyê Dêrsimî bi rayraşîyayîşê bêvengî ameyî yadkerdene. Komeleya Elewîyanê Demokratîkan (DAD), rêxistina DEM Partî ya Dêrsimî, Komeleya Pîr Sultan Abdalî, îdarekarê ESPyî û xeylê dezgehê komelê sîvîlî û xeylê kesî tewrê rayraşîyayîşî bîyî.

Rayraşîyayîşo ke Kuçeyê Hunerî de ame destpêkerdene Meydanê Seyîd Rizayî de qedîya. Tewrbîyayoxî  posterê Seyîd Riza û pankartê sîyayî kiriştî. Meydan de eşkerayîye ameye dayene. Eşkerayîye de ame vîrvîstene ke 1938î de bi des hezaran kesî ameyî qetilkerdene, bi hezaran kesî bi zorî erdî ci ra vejîyayî û bi seyan domanî ameyî qetilkerdene û ame vatene ke badê qirkerdişî asîmîlasyono kulturkî bi xorî û hêrişê giranî yê vera bawerîya elewîyan dewam kenê.

Serekê Federasyonê Komeleyanê Dêrsimî (DEDEF) Aliriza Bilirî  veng da ke wa cayê mezelan bêro eşkerakerdene û tarîxî dir bêro têrî.

Serekê Komeleya Pîr Sultan Abdalî Cuma Erçeyî zî vat verê demokrasîyê Tirkîya de astengo tewr gird o yo ke tarîxî dir têrîameyîş nêbîyo.

Serekê EMEPî yê Bajarî Orhan Çelebîyî zî ard ziwan ke dejo ke 88 serrî yo dewam keno vîrê komekî de ganîtîya xo paweno û vat gerek berpirsîyarî bêrê muhakemekerdene û têrîameyîşo komelkî bêro caardene.

Hemvervatoxa Komîsyonê Bawerî û Şaran ê  DEM Partî Yuksel Mutlu zî Terteleyê Dêrsimî sey qirkerdişî name kerd û vat heta ke têrîameyîş nêbo Tirkîya çew nêeşkeno qala demokrasîyî bikero.

Hemserekê Pêroyî yê DADî Zeynel Keteyî zî vat eşkeranêkerdişê cayê mezelan cayanê zîyaretî ke bawerîya elewîyan de bimbarkî ma înan ra mehrum verdeno. Keteyî vat na rewşe yena manaya hêrişê vera vîrê komelkî, kultur û bawerîye ke ê nê tewirî çirey qebul nêkenê.