Hemserekîya Konseya Rayberdişî ya KCKyî badê şehadetê Endamê Heyetê Îmraliyî Sirri Sureyya Onderî mesajê serweşîye pare kerd û nê vatî:

''Ma pê dejê pîlî şehadetê Sirri Sureyya Onderî eşnawit. Rixmo ke rewşa ey girane bî sey pêrune  ma zî pawitêne ke o bibo weş. Çi heyf ke wina nêbi. Ewlado erjîyaye yê şarê ma ke Tirkîya tira zaf çî pawitene û heta nika semedê têkoşînê azadîye, demokrasî û haştîye zaf çî kerd, çi heyf ke mîyanê ma ra vejîya şi. Seba ke ma merdimêkê têkoşînî yo wina muhîm vînî kerd, dejê ma gird o. Sere de keye û merdimê ci ma pêro heskerdox, dost, embazê ci yê karî, camîaya huner- sînema, DEM Partî û şaranê xo rê serweşîye wazenê, ey bi hurmet yad kenê.

Şehîdê haştîye û demokrasîyî

Sirri Sureyya Onderî gama ke xebeta zaf muhîme ya semedê haştîye û demokrasîyî rayra berdêne nêweş kewt û çi heyf ke netîceya nê de dinyaya xo bedilnaye. Na mana de o şehîdê haştîye û demokrasîyî yo. Sirri Sureyya Onder merdimê têkoşînêkê girdî yo. Sosyalîst, şorişgêr û welatperwer o. Cuya ci bi têkoşînê sosyalîzm, demokrasî û azadîye ravîyarte. Semedê nê bedelê giranî dayî. Taybetîya ci ya tewr muhîme zî aya ke sey serkêşê têkoşînê têgêrayîşê sosyalîstan û têkoşînê sosyalîzmî paştî daye têkoşînê şarê kurdî û neferêko muhîm ê nê têkoşînî bi zî. Ey cuya xo de têkoşînê wird hetan kerdî yew û wina qeyde çîyo ke Tirkîya de tewr zaf yeno waştene ard ca. Reyna bi kesayeta xo ya hunermendî û xebatanê xo zî semedê averşîyayîşanê komelkî xebatê muhîmî kerdî.

Xeta Mahîr û Yilmaz Guneyan temsîl kerde

Sirri Sureyya Ondero sînaye yo ke pê hûmartişî taybetîyê ci yê pozîtîfî nêqedîyenê, pê cuye, huner û têkoşînê sosyalîzm û demokrasîyî xeta Mahîr, Denîz, Îbrahîm û Yilmaz Guneyan bi heqê ci temsîl kerd û bi neferanê muhîman ra yew ke na xete roja ma de kirişeno. O menga şehîdan gulane de şehîd bi. Bi na wesîle ma şexsê ey de şehîdanê menga gulane û heme şehîdanê şoriş û demokrasîyî bi hurmet û mînetî yad kenê.

Gerek ma têkoşînê haştîye û demokrasîyî ser bifînê

Sirri Sureyya Onderî yê sînayeyî xebeta haştîye ya ke zaf muhîm a rayra berdêne, serkêşîya ci kerdêne. Tira hema pawitişê zaf gird bibî la xebetê ke heta ewro kerdî zî zaf gird bî û pîya bi embezanê xo yê xebete, xebatê haştîye heta nuqtayêka muhîme ardî. Ma semedê şehadetê ci dejê pîlî biancê zî, semedê layîqbîyayîşê vîrameyîşê ey rayîro tewr raşt xurtkerdiş û serkewtişê têkoşînê haştîye û demokrasîyî yo. Ma do semedê caardişê nê xîret bikerê. Ma veng danê ke wa her kes têkoşînê Sirri Sureyya Onderî bigîro ermeyanê xo ser û semedê serekwtişê ci zaf xîret bikero.''