Tirkîya bi serran o binpaykerdişê heqan ê tewr girdî zîndanan de qewimîyenê.  103 hezar û 179  kesî seba ke înfazê înan bi hewayêk keyfî ameyî peydeştene zîndanan de sey rehînî yenê tepiştene. Goreyê qanûnî tepiteyanê ke zafê cezaya xo ant gerek bêrê veradayene la bi qanûnê înfazî ke 2020î de vejîya Heyetê Îdare û Çimdarî ameyî ronayene ke hetê ci ra tehlîyeyî yenê astengkerdene.

Hemvervatoxê Komîsyonê Zîndanan ê OHDyî Avûkat Zekî Bînbîrî derheqê caardişanê keyfîyan ê vera tepişteyan de ANFyî rê qisey kerd,  wina vat: ''Binpaykerdişo tewr gird zîndanan de beno. Seba ke ma binpaykerdişê zîndanan teberî rê bidê eşnawitene û bikerê rojdem û nê binpaykerdişanê heqan werte ra wedarê ma sey Şûbeyê Amedyî yê OHDyî zaf karan rayra benê.

Heyetê Îdare û Çimdarî sey mehkeme derheqê tepişteyan de qerar genê ke no goreyê qanûnî nîyo. Dinya de çîyo wînayên çîn o. Kesê ke huqûqnas nîyê nêeşkenê sey mehkeme qerar bigîrê. Nê heyetî tepişteyan ra wazenê wa poşman bibê ya zî bi bahaneyanê cîya cîyayan tehlîyeyan peyde erzenê. Dewlete bi nê heyetan kena ke kurdan bigîro binê zextî. Çunke têna tehlîyeyê tepişteyanê polîtîkan yenê astengkerdene.

Gerek heqê hêvî yê Birêz Abdullah Ocalanî bêro caardene Seba ke no proses aver şiro. Gerek dewlete game bierzo. Sey gama verêne gerek azadîya Birêz Abdullah Ocalanî  bêra caardene û  tepişteyê ke 30 serrî yo zîndan de yê û tepişteyê nêweşî cade serbest bêrê veradayene.''