Wendekarê kurdê ke unîversîteyanê Almanya de wanenê bi şîarê, “Dîrokê fêm bike, sînoran derbas bike, Kurdistanê yek bike” vizêr heyeta Saalbau Gallusî ya Frankfurtî de  kongre kerde.

Kongreya ciwanan bi wendişê marşa Ey Raqipî dest pêkerde û dima ra derheqê tarîxê wendakaranê kurdan ê Vakur, Başûr, Rojhilat û Rojawanî de sînevîzyonêk ame ramojnayene.

Kongre de profesor Carsten Krinn û dayîka Ferhat Unvarî yo ke 2020 bajarê Hanau yê Almanya de hêrişê faştîstan ame qetilkerdene, Serpîle Unvar qisey kerd. Grûba folklorî zî bi renganê xo yê tradîsyonkî vejîyaye sehne.

Badê qiseykerdişan derheqê rêxistinbîyayîşê dîaspora, ravîyartişê sîstemêkê rêxistinkerdeyî yê neweyî de platformêkê munaqeşeyan ame ronayene.

Unîversîteyanê Vakur, Başûr, Rojhilat û Rojawanî ra wendekarî bi rayîrê telekonferansî tewrê kongre bîyî û semedê  yewîya neteweyîye ya mabênê ciwananê kurdan vengdayîşê seferberîye kerde.

Hemsereka Daîreyê Tekîlîyanê Teberî yê Îdareyê Xoserî yê Rojawanî Îlhame Ehmed zî mesajêk şawit, bale ante muhîmîya yewîya neteweyîye ser û kongre selam kerd.

Badê munaqeşeyan sey rêxistina serbanî ya wendekaranê unîversîte Cematê Wendekaranê Kurdan (Gemeinschaft der kurdischen Studierenden) ame ronayene. Netîceya vîjnayîşan de panc kesan ra koordînasyonêk ame ronayene.

Kongre bi goştarîkerdişê muzîkî qedîyaye.