Serekê Pêroyî yê CHPyî Ozgur Ozel zî tewrê merasîmê oxirkerdişê Sirri Sureyya Onderî bi. Ozel gama ke Merkezê Kulturî yê Ataturkî (ATK) ra vejîya raştê hêrişî ame.

Hêrişkarê ke wextê hêrişî vat o domanê osmanî yo, girmike dayî rîyê Ozelî ro. Polîsan hêrişkar destbend kerd. Vejîya werte ke hêrişkar Selçuk Tengioglu 2004 de Iskenderun de  di domanê xo yê bi nameyê Bariş û Mutlu kiştî. Reyna xeylê sûcanê bînan ra zî  qeydê ci est ê.

DEM Partî hêrişê vera Ozgur Ozelî şermezar kerd û vat, ''No hêriş eslê xo de şexsê Sirri Sureyya Onderî de vera cigêrayîşê komelê haştîye û demokratîkî provokasyonêk o; vera poltîkaya haştîye û wayûbiratîye ya partîya ma yo.''

Hemserekanê Pêroyî yê DEM Partî Tulaye Hatimogullari û Tuncer Bakirhanî zî eşkerayîya nuştekîye vera hêrişî hêrsê xo ard ziwan. Hemserekan vat, ''Merdimê bianorî yê nê welatî do teslîmê nê senaryayonê leyminan nêbê. Gerek kerdox û zîhnîyetê peyê nê hêrişî bêrê eşkerakerdene. Ma telefon de Birêz Ozgur Ozelî de qisey kerd. Ma reyna verê rayrapêroyîye de vanê derbazî bo.''