Endamê Heyetê Îmraliyî yê DEM Partî û Serekwekîlê Meclîsî Sirri Sureyya Onderî vizêr nêweşxane de dinyaya xo bedilnaye. Semedê Onderî verî Merkezê Kulturî yê Ataturkî (AKM) yê Taksîmî de merasîmêk ame kerdene û dima ra cenaze ameye berdene Camîyê  Hayretîn Barbaros Paşayî yê Şişliyî. Bi hezaran kesî  AKMyî ra heta camî bi sloganan rayra şîyî.

Bi hezaran kesî verê camî de ameyî têhet, zafê înan nêeşkayî hesranê xo tepişê.  Dayîka Onderî Zelîha Onder verê tabûtê lajê xo de xeylê wext hesir kerdî war.

Hemserekê Pêroyî yê DEM Partî Tulaye Hatimogullari û Tuncer Bakirhan, Endam Heyetê Îmraliyî Pervîne Buldan, Wekîlê DEM Partî, Hemvervatoxê HDKyî Merale Daniş Beştaş û Ali Kenanoglu, sîyasetmedarî Ahmet Turk û Leyla Zana, Hemserekê Pêroyî yê ESPyî Murat Çepnî, Hemserekê Pêroyî yê EHPyî Hakan Ozturk,Başake Demîrtaş, Serekê Meclîsî Numan Kurtulmuş, Serekê Pêroyî yê CHPyî, Ozgur Ozen,Wekîlê CHPyî yê Amedî Sezgin Tanrikulu, Kemal Kiliçdaroglu, Vervatoxê AKPyî Omer Çelik, Serekê Partîya Ameyoxî Ahamet Davutoglu, Serekê Pêroyî yê Partîya DEVA Ali Babacan, Serekê Pêroyî yê Newera Partîya Refahî Fatih Erbakan, Serekê Grûba AKPyî Abdullah Guler û xeylê temsîlkar, îdarekar û serekê partîyanê sîyasîyan tewrê merasîmî bîyî.

Camîaya hunerî ra zî xeylê kesî tewrê cenaze bîyî. Cinîya Ahmet Kayayî Gultene Kaya, rejîsor Yilmaz Erdogan, Îbrahîm Tatlises, Mahsum Kirmizigul, tarîxnas Îhsan Eliaçik û xeylê kaykerdox, hunermend, nuştox û rojnamegerî tewrê merasîmê cenaza bîyî.

Merasîmê camî de ke bi hezaran kesî tewrê ci bîyî sloganê sey ''Sirri Sureyya Onder bêmerg o'', ''Şehîd namirin'',  ''Elçîyê haştîye bêmerg o'' ameyî vatene. Bi wesayetê Sirri Sureyya Onderî nimajê cenaza Ihsan Eliaçikî da kerdene.

Badê nimajî girse semedê definkerdişê cenaza kewt rayîrê Mezelanê Zincirlikuyu. Cenazaya Onderî ke doşê heskerdoxanê ci de bi tîlîlîyan ameye kiriştene mezelan de bi slogananê  ''Elçîyê haştîye bêmerg o'' ameye definkerdene û mezelê ci bi vilikan ame xemilnayene.