Rixmo ke Almanya de bi sedan komelê kurdan estê, 13ê înan de kursê kurdkî esto Hemserekê KON-MEDî Tahîr Koçerî derheqê mesele de qisey kerd vat ganî hem keyeyî hem zî dezgehê kurdan semedê averşîyayîşê kurdkî hîsgêr bê.

Almanya de bi mîlyonan kurdî estê. Rixmê ney zî 5 eyaletan de (NRW, Bremen, Niedersachsen, Rheinland-Pfalz û Berlin) û 15 şaristanan de Hannover, Bremen, Herne, Mainz, Berlin, Dortmund, Koln, Leverkusen, Oberhausen, Duisburg, Bielefeld, Herford, Essen, Wesel ve Hamm) dibistanan de dersê kurdkî estê. 3 hezar domanê kurdî  tewrê nê dersanê kurdkî (kirdkî, kurmanckî û sorankî) benê. Hetê bînî ra Almanya de 71 Merkezê Komelê Demokratîkî yê Kurdan (NCDK) estê û 13ê înan de kursê kurdkî esto. 

Hemserekê  KON-MEDî Tahîr Koçerî derheqê mesele de  rojnameyê Yenî Ozgur Polîtîka rê qisey kerd û ard ziwan ke dîasporaya kurdan na babete de mesuldarîya xo nêana ca. Koçerî vat: ''Neslê neweyî hînî kurdkî qisey nêkenê. Eke mudahele nêro kerdene kurdkî do vîran ra şora. Heta prosesê pandemî  Darmstadt, Saarbrucken, Giessen, Reutlingen, Bremerhafen, Heilbronn, Hannover, Lehrte, Essen, Osnabruck, Dortmund, Wuppertal, Euskirchen de NCDKyan de dersê kurdkî estbî. Seba ke dibistananê almanya de kurdkî sey ziwanê perwerdeyî bêra qebulkerdene ma amade yê ke bixebitê. Ganî rayberîya dezgehanê sey Enstîtuyê Kurdan de ma seba kurdkî kampanyayan bikerê û seba kurdkî xebatan bikerê.''

Koçerî bale ante ser ke ganî hûmara kursan bêra zêdînayene û vat: ''Mamostayê kurdkî zaf ê la ma nêeşkenê nînan îstîhdam bikerê. Ganî komeleyê ma keyeyan na babete de teşwîq bikerê û seba ke mekteban de kurdkî vila biba xîret bikerê.''