Nobeta Azadîye her hewte şaristanê Strasbourgî yê Fransa de pê komêka cîya yena kerdene û emser serra 9. ya çalakîya nobete ya. Nobeta Azadîye 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene.

Çalakîye verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê  Îşkenceyî ya Konseya Ewropa (CPT) de yena kerdene. 

Hewteyê 456. de koma Mantes la Jolie nobete dewr girewte ke kome de kurdîstanijî Yusuf Karataş, Dîno Madî û Seyfettîn Bîngol estê.

 Yusuf Karataşî nameyê kome ser o qisey kerd û vat: ''Rayberê ma kurdî şîyar kerdî, ey ra nêbîyêne çîyêkê kurdan nêmendbi. Kurdan pê na çalakîya xo mojna ke ê do têkoşînê xo ra fek vera nêdê. Tecrîd sûcê merdimîye yo. Kurdî nêeşkenê Rayberê xo ra xeberêke bigêrê. Ma semedê weşîya Rayberê xo qerqilîyenê û ganî dewleta tirke ney fam bikera. Ganî CPT cade bikewo dewre. Wa cade Rayberê ma avûkat û keyeyê xo bivîno.''

Karataşî grevê vêşanîye yê tepişteyan selam kerd û da zanayene ke heta tecrîd biqedo û Abdullah Ocalan azad bibo ê do çalakîyanê xo dewam bikerê.