Seba ke tecrîdê serê Rayberê Şarê Kurdî Abdullah Ocalanî bêro wedaritene, yew hetî ra grevê vêşanîye yenê domnayene û hetê bînî ra zî nobeta Ocalanî rê Azadîye ya ke kewta hewteyê 345’î, verê banê Konseya Ewropa de dewam kena.
Nobeta Ocalanî rê Aazadîye kewte hewteyê xo yê 345’î. Nobete verê banê Konseya Ewropa ya Fransa de yena domnayene. Nobete bêmabên dewam kena û her hewte yew grûba neweye nobete dewr gêna. No hewte zî grûba ke bajarê Almanya Essen ra ameya nobete dewr girewte. Grûbe de Zafer Dêrsim, Mehmet Vêranşar û Fettah Cîrît ê welatperwerî ca gênê.
Hewteyo verên Têgêrayîşê Cinîyan ê Elewîyan (FEDA) nobete de bî û no şewdir saet 07.30 de nobete ameye dewrkerdene. Çalakwanî şewdir ra heta saeta vereşanî ya 16.30‘î, broşur û kitabê ke seba Ocalanî ameyê amadekerdene kenê vila û merdimanê derûdorî de derheqê Ocalanî de qisey kenê.
Bi nameyê grûba Essenî yew beyanat ame dayene û wina ame vatene: “Rayberê Şarê Kurdî Abdullah Ocalanî ser o tecrîdêko giran esto û Komîteya Vergirewtişê îşkenceyî ya girêdayîya Konseya Ewropa no derheq de wezîfeyê xo nêana ca û bêveng manena. Na bêvengîye nêna qebulkerdene.“
Nobeta Ocalanî rê Azadîye 25’ê Hezîrane 2012’î de dest pêkerdebî û heta nika nêzdîyê 2 hezarî kesî beşdarê nobete bîyê.
