Nobeta Ocalanî rê Azadîye ya ke çalakîya tewr derge ya Kurdan ê Ewropa ya hetê grûba cinîyan ê Marsîlya ra dewr ameye girewtene. Çalakwanan veng da KE û CPT’yî û waşt ke vera polîtîkayanê şerî û tecrîdê serê Ocalanî game bierzî.
Nobeta Ocalanî rê Azadîye ya ke 25’ê Hezîrana 2012’yî ra vernîya Komîsyonê Ewropa ( KE) de yena domnayene, hewteyê 348’ine de bi qerardarîya girde dewam kena.
Nobeta Azadîye ke hewteyo ravêrte hetê grûba Bernî ra ameye tepiştene no hewte hetê grûba cinîyan a bajarê Marsîlya yê Fransa ra dewr ameye girewtene. Grûbe de cinîyê bi nameyê Adelet Bîlîre, Rabîa Demîrbaşe û Fatma Nesanire ca gênê.
Bi nameyê grûba Marsîlya eşkerayîyêk ameye dayene. Eşkerayî de girevê vêşanîye yê ke semedê wedartişê tecrîdê serê Rayberê Şarê Kurdî Abdullah Ocalanî yenî viraştene ameyî silamkerdene û Konseya Ewropa û Komîteya Vernîgirewtişê Îşkenceyî (CPT) ra ame waştene ke berpirsîyarîya xo bica bîyarê. Çalakwanan bale ante ke sere de Leyla Guvene û Nasir Yagiz rewşa weşîya xoverdayoxanê grevê vêşanîye kewta merhaleya krîtîke û waşt ke CPT û KE cade gamêk bierzê.
Çalakwanan bêvêngîya Ewropa rê hêrsê xo ard ziwan û va:‘‘ Dewletê Ewropa tim qala demokrasî û heqanê merdiman kenê la vera polîtîkaya hêrişkare ya dewleta Tirkî ya vera Kurdan de bêvêng ê. Ocalan vera plananê qirkerdişê şaran ê dewleta Tirkî rayîrê aşitî û dîyalogî akeno. Coka tecrîdkerdişê Ocalanî û naye rê bêvêngîya Ewropa nêna qebûlkerdene. Eke grevan de çîyêko xirab bibo berpirsîyara ci Ewropa ya.‘‘
