Rixmê Peymana Cenevre zî dewletê neteweyî her roje sûcanê şerî û vera merdimatîye kenê. Peymana Cenevre wextê Şerê Dinya yê Diyînî de amebî îmzakerdene la ewro cewab nêdana waştişan. 

Komîserê Komîsyonê Huqûqnasan ê Mîyanneteweyîyî û Profesorê Huqûqê Mîyanneteweyîyî yê Zanîngehê Cenevre Prof. Marco Sassoliyî  derheqê babete de ANFyî rê qisey kerd.

Sassoliyî pare kerd ke mabênê Uktayna û Rûsya de nakokîyêka mîyanneteweyîye est a û vat: ''Filîstîn de pêkewtiş û Gazze de îşxalêko leşkerî est o. Hetê bînî de Tirkîya de şerêko çekdar mabênê PKK û hêzanê dewlete de est o. Tirkîya tim pênaseyê şerê çekdarî red kena û îdîa kena ke a operasyonê vera terorî kena. Na noqta de çew zor nêdano Tirkîya ke nê şerî qebul bikera.''

Sassoliyî dîyar kerd ke naye ra Peymana Cenevre yena binpaykerdene û vat: ''Binpaykerdişî asta skandalî de yê. Huqûqê merdimatîye her cayê şerî de yeno binpaykerdene. Xeylêk rewşan de nê dezgehî neçare yê ke huqûqê merdimatîye bîyarê ca. Dewletê mîyanneteweyîyî terefî gênê. Mîsal derheqê şerê Ukrayna de dewletî Rûsya rexne kenê la şerê vera PKKyî de Tirkîya rexne nêkenê.

Nika Tirkîya Sûrîye de, Rojawan de îşxalker a. Seba ke dewleta kurdan çin a huqûqo mîyanneteweyî Kurdîstan de estbîyayîşê Tirkîya sey îşxalî nêvîneno. La ancî zî uca de krîterê heqanê merdiman yenê binpaykerdene.''