Almanya de, qedexekerdişê weşanxaneyê Mezopotamya û MÎR Muzîkî şono verê destê hakîmî. Avukatan va, ê do muracatê Mahkemeya Qanûnê Bingehênî ya Federale bikerê. Parlamenter Jelpkeye zî bi razînêbîyayîşê xo reaksîyon da hukmatê Merkele.
Sazîyê Kurdan ê muhîmî yê Almanya, Weşanxaneyê Mezopotamya û MÎR Mûzîk vizêrî, bi fermanê Wezîrê Karanê Zereyî Horst Seehoferî, bi hewayêkê fermîyî ameyî girewtene. Vizêrî 60 polîsan eşt her di sazîyan ser û berê sazîyan mor kerdî.
Qedexekerdişê her di sazîyan do şoro verê destê hakîmî. Avukatê sazîyan do muracatê Mahkemeya Qanûnê Bingehênî ya Federale bikerê û vera qerarê Wezaretê Karanê Zereyî îtîraz bikerê.
WAZENÊ KE VENGÊ KURDAN BIBIRNÊ
Avukatan ra Peer Stolleyî va bi nê qedexeyî kenê ke Almanya de veng û rengê Kurdan qedexe bikerê. Reyna Stolleyî va qet alaqaya nê qerarê Wezaretê Karanê Zereyî bi qanûnî çin a û ê do vera nê qerarî, muracatê Mahkemeya Qanûnê Bingehênî ya Federale bikerê.
Avukatanê sazîyanê Kurdan ra Berthold Fresenîûsî zî bale ante kerdenanê hukmatê Almanya û rejîmê Erdoganî ser û va sey yewbînî têgêrenê. Fresenîûsî ard vîrî ke rejîmê Erdoganî bi zîhnîyetê xo yê qedexekarî, muxalefet kerdo bêveng û Wezaretê Karanê Zereyî yê Almanya zî bi eynî zîhnîyetî têgêreno. Fresenîûsî va Almanya bi nê qedexeyan kena ke destê rejîmê Erdoganî hîna bibo pêt û Tirkîya hîna zêde şoro Kurdan ser.
JELPKE: SEEHOFER RÊÇA ERDOGANÎ SER O YO
Parlamentera federal a Partîya Çepe Ûlla Jelpkeye zî razînêbîyayîşê xo yê vera qedexeyî yo ke vizêrî hetê Wezîrê Karanê Teberî ra ameyo girewtene ard ziwan. Jelpkeye bale ante ser ke Tirkîya de senî ke medyaya muxalîfe û çapemenîya Kurdan yena qedexekerdene, bi eynî şert û mercan Seehofer zî Almanya de ano bicaardene û va: “Wezîrê Karanê Teberî rêça despotê Tirkî ser o yo.“
Jelpkeye vera qedexeyî beyanatêko nuştekî weşêna û seba qedexeyî va, vera kultur û hunerê Kurdan “sansurê dewlete“ yo. Reyna Jelpkeye ard vîrî ke bi destûrê hukmatê Almanya, çek û sîlehî dîyenê Tirkîya û Wezîrê Karanê Zereyî keno ke heqa xebergirewtişê Kurdanê Almanya asteng bikero.
Dewamê beyanatê Jelpkeye de wina ame vatene: “Dest nîyayo bi tonan kitabanê ziwanê Kurdî, kitabanê domnanan ê Kurdî û kitabanê tarîxê Kurdan ser. No hêriş vera Kurdanê Almanya yê ke humara xo mîlyonêk ra zêdeyêr a yeno kerdene. Bi nê qedexeyî Kurdanê Almanya ra vanê “ziwan, kultur û tarîxê xo memusê“. Na qetîya nêna qebûlkerdene. Qedexeyê serê PKK‘yî yê 25 serran zî ganî êdî bêro wedaritene.“
