Seba şermezarkerdişê komploya mîyanneteweyîye ya serra 20’ine ya vera Rayberê Şarê Kurdî Abdullah Ocalanî û seba paştîdayîşê çalakwananê grevê vêşanîye rayraşîyayîşê Baselî ra heta Strasboûrgî kewt roja 5’ine.

Çalakwanê ke Seşeme 20 km ray ra şîyê eynî roje reştî Colmarî yê Fransa. Çalakwanan ewro siba zî dest bi qonaxa xo ya pancine kerd. Vernîya rayraşîyayîşî eşkerayêk ameye dayene, hêrişê dewleta Almanya yê serê sazgehanê Kurdan û çalakwananê rayraşîyayîşê rayberîya ciwanan ê Mannheîm-Strasboûrgî ame şermezarkerdene.

Hemsereka KCDK-E'yî Fatma Goksungure bale ante ser hemkarîya dewleta Almanya û Tirkîya û vat, hêrişê serê rûmetanê Kurdan dewam kenê û wina dewam kerd: ’’ Ma do qetî padayîşê Mîr Muzîkî û Weşanxaneyê Mezopotamya qebûl nekenê. Ma tîya ra veng bi Almannya kenê, ganî hemkarîya xo ya ke dewleta Tirkî reyde esta biqedêna. Ganî her kes bizano ke, qet çîke nêeşkeno verê ma bigo ke ma nêvejê,  ''Bijî Serek Apo''. Hêzê qet kesî nêşono nê, ganî nê wina bizanê. Vera Ocalanî bêtehemulîye, paştîdayîşê polîtîkayê qirkerdişî yê dewleta Tirk a faşîste yo.''

HER CA DE SLOGANÊ SEBA OCALANÎ GULBANG DANÊ

Qiseykerdişan ra dima çalakwanî bi marşê ‘Şerxa Şoreşê’ û pankarta “Ma tecrîdî bişiknê, faşîzmî birijnê, Kurdistanî azad bikerê” û bi slogananê “Biciwîyo Serek Apo, Ocalanî rê azadîye, biciwîyo xoverrodayîşê zîndanan”, “Qetilkar Erdogan” dest rayîrşîyayîşî kerd. Roja 5’ine de rayraşîyayîşî rê parlament û hemşaredarê HDP'yî rayberîye kenê. Rayraşîyayîşî de reyna xoverrodayoxê grevê vêşanîye ameyî silamkerdene û ame vatene ke “biciwîyo xoverrodayîşê Leyla”. Nê 4 rojanê peyênan de rayraşîyayoxî 80 km ray ra şîyî,  ewro zî hedef o yo ke 26 km do bişorê û saetanê şanî de biresê Selastadî.