Grevê vêşanîye yê Strasbourgî roja 50’î ra vîyart. Rennere û parlamenterê partîye yo Kurd Gokay Akbulut pîya ameyî zîyaretê xoverdayoxan.

Rennere zîyaret de, Yuksel Koç o ke hetê weşîye ra bîyo giran de qisey kerd û derheqê talebanê xoverdayoxan de qisey kerd, va ganî tecrîd bêro wedaritene.

MA WAZENÎME KE WA TECRÎD BÊRO WEDARNAYENE

Martîna Rennere va ma sey Partîya Çepî, paştdarîye danîme xoverdayoxanê grevê vêşanîye û wina dewam kerd: “sîyasetmedarê HDP‘yî ganî azad bibê û tecrîdê serê Rayberê Şarê Kurdî Abdullah Ocalanî bêro wedaritene.“

Rennere bale ante polîtîkayanê Tirkîya yê Surîye ser û wina va: “Mabênê Tirkîya û çeteyanê DAIŞ’î de têkilîyî estê û seba ke welatê Ewropa no derheq de bêveng manenê Kurdî benê aciz û qesawet kenê. Ma zî coka Kurdan het de yîme û paştarîye danîme Kurdan.“ 

WA ALMANYA TÊKILÎYANÊ XO YÊ TIRKÎYA QUT BIKERO

Martîna Rennere va ma talebanê Kurdan sey talebanê xo vînenîme û nê taleban Parlamentoyê Federalî yê Almanî de anîme rojdem. Rennere va ganî Almanya sîleh nêdo Tirkîya û pêro têkilîyê sîyasîyî, leşkerî û îstîxbaratî bêrê qutkerdene.

Rennere wina qisey kerd: “Tirkîya û Ewropa de xeylî kesî seba heqanê demokratîkan xover danê, la no derheq de bêvengîyêka pîle esta û ganî ma naye bivînîme. Her hetê dinyaye de pêkewtişî estê û sebebê bêvengmendişî ra yew zî no yo. Almanya de 25 serrî yo ke qedexeyê PKK‘yî esto û no qedexe nêverdano ke şar Kurdan hîna baş bişinasno û fehm bikero.“

EWROPA XEYLÎ ÇÎYAN PEYGOŞ KENA

Rennere yew persa derheqê tecrîdê serê Rayber Ocalanî wina cewab kerde: “Almanya û xeylî welatê Ewropa, seba ke Tirkîya de Peymana Maciran îmza kerda nêwazenê zaf şorê Tirkîya ser. Nê sebebî yê polîtîkaya zereyî yê. Yew zî yê sebebê polîtîkaya teberî esto. Tirkîya endamê NATO’yî ya. Nê sebeban ra paştdarîye danê rejîmê Erdoganî. Talebê çalakwananê grevê vêşanîye heqê unîversal ê û ganî Ocalanî ser o tecrîd bêro wedaritene. Tirkîya de çapemenîye ser o tedayê giranî estê, mehkemeyan de dewayî bi hewayê sîyasîyî yenê dîyayene û Ewropa nê pêro probleman peygoş kena. Ganî hukmatê Almanya dest bierzo nê probleman û Erdoganî ra vajo ma hetkarîya to nêkenîme. “

HÎNA KE WEXT EREY NÎYO, GANÎ HETÊ DEMOKRATÎKÎ TÊ BIGÊRÊ

Rennere qiseykerdişê xo de bale ante bêvengîya Ewropa ser û wina qisey kerd: “Seba ke her kes bêveng o û nêwazeno bivîno, ma wazenîme hîna zêde bixebetîme û vengê çalakwananê grevê vêşanîye biresnîme her ca. Hîna ke erey nîyo, hîna ke wext derbaz nêbîyo, ganî pêro kes û hetê demokratîkî tê bigêrê.“