Eyaletê Almanya yo tewr gird NRW de parlamenteranê Partîya Zergûnan û SPDyî vat ke waştişê çalakwananê grevê vêşanîye yê seba wedartişê tecrîdê serê Rayberê Şarê Kurdî Abdullah Ocalanî ganî bêro ca.
Her roje sîyasetkaranê partîyanê cîyayan ê Ewropa ra seba wedartişê tecrîdê girankerdeyî yê serê Rayberê Şarê Kurdî Abdullah Ocalanî wedarîyo vengdayîşêko newe yeno kerdene. Tewr peynî endamê Meclîsê Renê Vakûrî yê Vestfalya (NRW) ke eyaletê Almanya yo tewr gird o Partîya Sosyale ya Demokratan (SPD) ra Îbrahîm Yetîm û Partîya Zergûnan ra Berîvan Aymaze veng da.
Her di parlamenteran beyanat da rojnameyanê pabesteyê Grûba Medya ya Funke, ke sazîyêka çapemenî ya namdare ya Almanya ya, ard ziwan ke ganî waştişê sîyasetkar û aktîvîstanê ke grevê vêşanîye de yê bêrê bicaardene. Parlamentera Partîya Zergûnanan Aymaze vat, “Ganî sîyasetê Almanan û Ewropa waştişanê çalakwananê grevê vêşanîye cidî bigîro, dîqetê xo bido serê nê meseleyî, eke wina mebo do hal hîna xirab bibo.”
‘WAŞTIŞÊ WEDARTIŞÊ TECRÎDÎ WAŞTIŞÊKO ÎNSANÎ YO’
Parlamenterê SPDyî Îbrahîm Yetîmî zî ard ziwan ke veradîyayîşê hemsereka KCDyî Leyla Guvene gamêka pozîtîf a û vat: “Dewaya Guvene bi hawayêkê eşkerayî ramojnena ke muxalefetê Tirkîya çende binê zextan de yo.”
Yetîmî qiseykerdişê xo wina domna: “Waştişê wedartişê tecrîdî tewirê ma yê merdimîye rê munasib o. Azadîya îfadeyî, pawitişê heqanê merdiman û muxalefetî seba hemkarîye peymeyê qetî yê ke ganî Hukmato Federal ê Almanya ramojno.”
Partîya Çepe seba ke hukmato federal cewab bido persêk kerdebî û 16ê Çile 2019 de serê nameyê îdareyê Berlînî de hetê wezîrê dewlete yê mesuldarê Karanê Ewropa Michael Rothî ra perse amîbî cewabkerdene. Rothî vatibi ganî Tirkîya goreyê pêameyîşanê mîyanneteweyan tecrîdê Îmraliyî wedaro.Rixmê nê cewabê Rothî de heta nika îdareyê Berlînî seba qedînayîşê grevanê vêşanîye tu vengdayîşêkê eşkerayî hukmatê Tirkî rê nêkerdo.
ÇAPEMENÎYA ALMANYA DE ÇALAKÎYA TÛZAKÎ
Nê mabênî de rojnameyanê ke pabesteyê Grûba Medya ya Funke yê ca da Mele Mustafa Tûzako ke şaristanê Duîsburgî de 15 rojî yo seba wedartişê tecrîdî grevê vêşanîye yê bêdem û bêagêrayîşî de yo. Tûzakî vat, “Şarê Kurdî bi serran o zext vîneno û yeno kiştene. Ez aşitî û edalet wazena.” Sere de NRW xeylî şaristananê Almanya de rojnameyanê cayîyan de ca dîya vatişê Tûzakî yê “Eke tecrîdê serê Ocalanî nêro wedartene ez do netîceyê na çalakîye de cuya xo vîndî bikerî.”
