Strasbourg de zîyaretê paştdarîye roj bi roje benê zêde. Yew gruba sendîkageran a ke sirgûn de ya, Strasbourg de xoverdayoxê grevê vêşanîye zîyaret kerdî. Zîyaretkaran waşt ke şarê Tirkîya seba wedaritişê tecrîdî vengê xo bikerê berz û çalakîyan bikerê.
Seba ke tecrîdê serê Rayberê Şarê Kurdî Abdullah Ocalanî bêro wedaritene, bajarê Fransa Strasbourg de 17’ê Teşrîna Verêne ra nat grevê vêşanîye dewam keno. Vizêrî zî temsîlkarê xeylî sazîyan û xeylî welatperwerî ameyî zîyaretê xoverdayoxan.
SENDÎKAGERÊ SIRGÛNBÎYAYEYÎYAN PAŞTDARÎYE DAYE XOVERDAYOXAN
Sendîkagerê KESK’î yê ke sirgûn de yê, Strasbourg de şîyî zîyaretê çalakwananê grevê vêşanîye. Mabênê sendîkageran de sekretera verî ya Egîtîm-Senî Sakîne Esenyilmaze, endamê Egîtîm-Senî Nîyazî Yilmaz, Leyla Çolake û Meryem Çale zî estîbî.
Her çiqas ke hetê weşîye ra rewşa ci başe nêbo zî Yuksel Koçî mêmanî qebûl kerdî û tede sohbet kerd.
TALEBÊ ÎNAN TALEBÊ MÎLYONAN Ê
Sekretera Egîtîm-Senî ya verêne Sakîne Esenyilmaze çarçewaya zîyaretî de qisey kerd. Esenyilmaze va seba haştîye, tecrîdê serê Ocalanî ganî bêro wedaritene û şaro Kurd zî paştdarîyêka hîna pête bido nê xoverdayîşî.
Endamê Egîtîm-Senî Nîyazî Yilmazî zî bale ante moral, bawerî û biqerarîya xoverdayoxan ser û va: ”Rewşa weşîye ya xoverdayoxan her ke şona bena xirabe. Hêz û kesê wezîfedar ê Tirkîya û Ewropa ganî bi lezkanî dest bierzê na mesela û CPT’yî ser zor bikerê.”
NÊ XOVERDAYÎŞÎ RÊ BIBÊ VENG
Meryem Çale zî qiseykerdişê xo de va ganî xoverdayîşî hîna bibê zêde û wina dewam kerd: ”No qirayîşê vera tecrîdî yo û tecrîd her kesî ser esto. Rewşe xitimîyaya û xoverdayoxî kenê ke nê xitimîyayîşî bikerê der. Her kesê ke Tirkîya de binê tesîrê bêçareserîye de yê ganî nê xoverdayîşî rê bibê veng û xo ver bidê.”
