Swêd de hêrişê vera Şengalî ame şermezarkerdene

Hêrişê dewleta tirke yê vera Şengalî paytextê Swêdî Stockholm û Helsinborg de bi çalakîyan ame şermezarkerdene.

Çalakîyan de ke bi vengdayîşê Merkezê Komelê Demokratîkî yê Kurdan, Yewîya Cinîyan a Sara û Meclîsê Cinîyan ê Amara ameyî kerdene qirkerdişê dewleta tirke yê vera Şengalî ame teşhîrkerdene. Sere de Neteweyanê Yewbîyayeyan venga komelê mîyanneteweyî ame kerdene ke tewirê xo bimojnê.

Stockholm

Kurdîstanijan û dostanê înan ê ke Meydanê Sergelstorg de ameyî pêser posterê Rayberê Şarê Kurdî Abdullah Ocalanî, alayê PKKyî, PJAKî, YPG-YPJyî berz kerdî û forografê qirkerdişê dewleta tirke rakerdî. Qiseykerdişan de ame vatene ke dewleta tirke 3 parçeyanê Kurdîstanî de qirkerdişan kena û ame parekerdene ke armancê dewleta tirke têna astengkerdişê destkewteyanê kurdan o. Heman wextî de ame vatene ke dewleta tirke DAÎŞî ra waşt ke qrikerdiş  bikero la ser nêkewt. Çalakîye de bêvengîya Neteweyanê Yewbîyayeyan ameye rexnekerdene venga hukmatê Swêdî ame kerdene ke bibê wayîrê tewirêkî. PJAKî zî paştî da çalakîyan. Çalakîye de sloganê ''Dewleta tirke Şengalî ra def biba'', ''Erdogano kiştox û faşîst'' ameyî vatene.

Helsinborg

Kurdistanijî û dostê înan Meydanê Storgetî de ameyî têhet û înan hêrişê dewleta tirke yê vera Şengalî şermezar kerd. Qiseykerdişan de ame vatene ke îtîfaqê faşîstî AKP-MHPyî şerêko giran ê vera kurdan da destpêkerdene. Ame vatene ke Erdoganî verê cû bi rayîrê DAÎŞî Şengal û rojawan de waşt ke qirkerdişan bikero la wexto ke ser nêkewt dest pê hêrişan kerd.Çalakîye de bêvengîya welatanê Yewîya Ewropa ameye şermezarkerdene.