Vervatoxê Têgêrayîşê Azadîye yê Belçîka Ludo De Brabanderî hêrişanê îşxalî yê dewleta tirke ser o meqaleyêke nuşte û bêvengîya welatanê rojawanijan (Ewropa) rexne kerde. Meqale bi serrnameyê 'rojawan vera hêrişê bînî yê dewleta tirke yê serê vakurê Iraqî bêveng mende' weşanîyaye.

Ludo De Brabanderî meqaleya xo de pare kerd ke îqtîdarê AKPyî mîyanê krîzê ekonomîkî de yo û rayanê xo vînî keno coka bi hêrişanê vera Rojawan û Başûrê Kurdîstanî wazeno neteweperwerîya tirkan bizêdîno.Ludo De Brabanderî da zanayane ke dewleta tirke pê hêrişanê xo yê vera Başûrî serdestîya erdê Iraqî binpay kena.

Ludo De Brabanderî meqaleya xo de bale ante Efrîn, Rojawan û Başûr de kerdişanê dewleta tirke ser û ard ziwan ke dewleta tirke şerê Ukrayna-Rûsya xo rê sey firsendêkî vînena û ney şuxilnena.

Ludo De Brabanderî vist vîrî ke NATO û Yewîya Ewropa vera hêrişanê Tirkîya bêveng ê û vat: ''Mabênê hukmatê Tirkîya û hukmatê Başûrî Barzanîyan de têkilîyêka hole est a. Ewropa krîzê Rûsya ra dima wazena çimeyanê gazî û petrolî yê Başûrî bişuxilna coka vera hêrişan tewirî nêmojnena. Tirkîya wazena bi destvistişê petrol û gazê Başûrî Ewropa muhtacê xo bikera.''